Memlekettik qyzmettegi bos oryndar qysqartylyp, jalaqysyn jaqsy jumys isteitin memlekettik qyzmetshilerge bólip beredi. Búgin úkimettiń keńeitilgen otyrysynda Prezident Nursultan Nazarbaev osyndai tapsyrma berdi, dep habarlaidy Baq.kz tilshisi.
«Men ózim qyzmettiń barlyq satysynan óttim. Bólimde 15 adam otyrsa, bar jumysty 3-aq adam isteidi. Qalǵany qalam ǵana ustaýdy biledi. Bilemiz ǵoi bárimiz. Osynsha adamdy ustap qajeti qansha? Olardy jumystan shyǵaryp, jalaqysyn jaqsy jumys isteitin qyzmetshilerge bólip berý kerek. Sonda bilikti adamdardy tańdap alýǵa múmkindik bolady», - dedi Elbasy.
Memlekettik qyzmet isteri jáne sybailas jemqorlyqqa qarsy kúres agenttiginiń tóraǵasy Qairat Qojamjarovtyń aitýynsha, ministrler men ákimderdiń qazir osyndai múmkindigi bar.
«B» korpýsynda attestatsiia júrip jatyr. Jańaǵy aitylǵan máseleni árbir ministr, ákim júzege asyra alady. Iaǵni, jumys istemeitin qyzmetkerlerdi bosatyp, onyń jalaqysyn qaldyryp, sol arqyly jumys isteitin azamattardyń jalaqysyn arttyrýǵa bolady», - dedi Memlekettik qyzmet isteri jáne sybailas jemqorlyqqa qarsy kúres agenttiginiń tóraǵasy Qairat Qojamjarov.
Onyń aitýynsha, memlekettik qyzmettegi 100 myńdai orynnyń búginde 17-18 paiyzdaiy bos tur.
«Men mindetti túrde bos 18 myń orynnyń barlyǵyn qysqartyp tasta dep otyrǵan joqpyn. Onyń ishinde taba almai júrgen kerekti adamdardyń orny bar shyǵar. Sonda da qysqartýǵa bolatyndardy qysqartyp, jalaqysyn qaldyrý kerek. Ákimder men ministrlerge jaqsy jumys isteitin qyzmetkerlerdiń arasynda bólip berýge ruqsat berip, jalaqyny kóterý kerek», - dedi N.Nazarbaev.
Prezident bolashaqta memlekettik qyzmetshilerdiń jalaqysyn biznestegi deńgeige jetkizý kózdelip otyrǵanyn aitty.
«Bul jemqorlyqpen kúres. 5 institýttyq reforma aiasynda memlekettik qyzmetshilerdiń tabysy boiynsha áli jetken joqpyz. Jaǵdai túzelgennen keiin ony jasaimyz, kóteremiz. Maqsatymyz - memlekettik qyzmetshilerdiń jalaqysyn biznestegi deńgeige jetkizý. Sonda qoiady. Biraq qazaq qoimaidy-aý. Qansha berseń de, az bolady», - dedi Memleket basshysy.
Aita keteiik, Qazaqstan Prezidenti Nursultan Nazarbaevtyń qatysýymen Úkimettiń keńeitilgen otyrysy ótti. Jiynda aldymen eldiń 2016 jylǵy áleýmettik-ekonomikalyq damýynyń qorytyndylary talqylandy. Keiin Memleket basshysy túiitkildi máselelerdi kóterip, aldaǵy jumysty aiqyndap, úkimet múshelerine tapsyrmalar berdi.
.jpeg)