Almatyda «QazTransGaz» basshysynyń burynǵy keńesshisi Sanjar Boqaevqa qatysty sot protsesi bastaldy. Ol birqatar qylmys jasady degen kúdikke ilingen. Qylmystyq is Qazaqstan Respýblikasy Qylmystyq kodeksiniń birden birneshe baby (190, 218, 188, 340 jáne 274-baptar) boiynsha qaralyp jatyr.
Tergeýshilerdiń paiymdaýynsha, Boqaev sybailastarymen birge iri kólemdegi alaiaqtyq shemasyn júzege asyrǵan. Sondai-aq ol osy jolmen alynǵan qarajatty zańdastyrdy degen kúdikke ilingen. Atap aitqanda, zańsyz tabystyń qaidan kelgenin jasyrý úshin qarajat túrli qarjylyq operatsiialar arqyly ótkizilgen.
Budan bólek, tergeýdiń málimetine sáikes, Boqaev granit taqtalardy urlaý men Baýma toǵaiyndaǵy aǵashtardy zańsyz kesýge bastamashy bolyp, bul áreketterdi uiymdastyrǵan. Ol sybailastarymen birge atalǵan qylmystardy beinekamera aldynda ádeii sahnalap, keiin jalǵan beinerolikterdi áleýmettik jelilerde jariialaǵan.
Eske sala keteiik, Sanjar Boqaev 2026 jyldyń naýryz aiynda Almatyda ustalǵan bolatyn. «Nur Otannyń» burynǵy ideologymen birge onyń jieni Madiiar Qalmenov pen jeke mobilografy Ulan Núsipqoja da sot aldynda jaýap berýde. Tergeý derekterine sáikes, Boqaev memlekettiń qatysýy bar kompaniialarda qyzmet atqarǵan kezeńde Qalmenov qarajatty zańsyz shyǵarýǵa kómektesken. Al Núsipqoja memlekettik múlikti urlaýdy uiymdastyrýǵa atsalysyp, aǵashtardy zańsyz kesý áreketin qosa alǵanda, aldyn ala uiymdastyrylǵan osy qylmystardyń barlyǵyn beinekameraǵa túsirgen.
