Almatynyń burynǵy ákimi Erbolat Dosaevtyń jubaiy, kásipker Gúlnar Dosaeva jańa kompaniia tirkedi. DOS&Co. Ltd. dep atalatyn uiymnyń kapitaly 100 mln teńgeni quraidy, dep habarlaidy ult.kz.
Kompaniia 14 qazanda Astana halyqaralyq qarjy ortalyǵynda tirkelgen. Onyń jalǵyz quryltaishysy - Gúlnar Dosaeva.
Qyzmet sipattamasyna qaraǵanda, DOS&Co. Ltd. holding retinde jumys isteidi. Kompaniia enshiles jáne úlestes kásiporyndardyń jarǵylyq kapitalyndaǵy úlesterdi satyp alyp, ielenýmen ainalyspaq. Sonymen birge toptyń damý strategiiasyn úilestirip, quramyndaǵy uiymdarǵa korporativtik jáne ákimshilik qoldaý kórsetedi.
Gúlnar Dosaeva Forbes Kazakhstan basylymynyń 2026 jylǵy eń yqpaldy 25 áiel reitinginde 13-orynǵa shyqqan. Al eń bai 25 áiel tiziminde onynshy satyǵa ornalasqan. Basylym onyń dáýletin 61 mln dollarǵa baǵalaǵan.
Kásipkerdiń aktivteri arasynda Lancaster Holding tobyndaǵy úlesi bar. Top munai-gaz qyzmetteri, ónerkásiptik infraqurylym, jer qoinaýyn paidalaný, taý-ken óndirisi, farmatsevtika, bilim berý jáne kadr qyzmetteri baǵytynda jumys isteidi.
Sondai-aq Dosaeva Gaýhar Qapparovamen birge “G and G Glamýr” jáne GGonline kompaniialaryna ielik etedi. Liýks taýarlar saýdasy men onlain satylymǵa mamandanǵan bul biznestiń Almaty men Astanada on býtigi bar.
Gúlnar Dosaeva qaiyrymdylyq bastamalarymen de ainalysady. Ol 2005 jyly jetim balalar men erekshe bilim berý qajettilikteri bar balalardy qoldaityn “Dara” qoryn qurǵan. Budan bólek, Dos.community ziiatkerlik volonterlik platformasyn iske qosyp, Nurlan Qapparov atyndaǵy qoǵamdyq qordyń teńquryltaishysy bolǵan.
Aita keteiik, naýryzda Erbolat Dosaev Prezident Ákimshiligindegi qyzmetinen bosatyldy.
Erbolat Dosaev kim?
Erbolat Dosaev – qazaqstandyq memleket qairatkeri, Almaty qalasynyń burynǵy ákimi. Ol 1970 jyly 21 mamyrda Almatyda dúniege kelgen. Oraz Jáýtikov atyndaǵy respýblikalyq fizika-matematika mektep-internatyn bitirgen. Almaty energetikalyq institýtynda jáne Baýman atyndaǵy Máskeý memlekettik tehnikalyq ýniversitetinde bilim alǵan.
Eńbek jolyn kásipkerlik jáne bank salasynda bastaǵan. Keiin memlekettik qyzmetke aýysyp, energetika, indýstriia jáne saýda vitse-ministri, qarjy vitse-ministri bolǵan. 2003–2004 jyldary Qarjy ministrligin, 2004–2006 jyldary Densaýlyq saqtaý ministrligin basqarǵan. Odan keiin ekonomikalyq damý, ekonomika jáne biýdjettik josparlaý, ulttyq ekonomika ministri qyzmetterin atqarǵan.
2016–2017 jyldary “Báiterek” holdinginiń basqarma tóraǵasy, 2017–2019 jyldary Premer-ministrdiń orynbasary bolǵan. 2019–2022 jyldary Ulttyq bankti basqarǵan. Almaty ákimi qyzmetin 2022 jylǵy 31 qańtardan 2025 jylǵy 24 mamyrǵa deiin atqarǵan. 2025 jyldyń qyrkúieginde Prezident Ákimshiligi basshysynyń orynbasary bolyp taǵaiyndalyp, 2026 jylǵy 25 naýryzda bul qyzmetten bosatylǵan.
