Qazaqstan Prezidenti Memlekettik qyzmet isteri agenttiginiń tóraǵasy Anar Jaiylǵanovany qabyldady, dep habarlaidy "Ult aqparat" Aqordaǵa silteme jasap.
Kezdesýde Memleket basshysyna Agenttiktiń 2020 jyly atqarǵan jumystarynyń negizgi qorytyndylary týraly egjei-tegjeili esep berildi.
Anar Jaiylǵanova vedomstvonyń memlekettik qyzmetke ornalasý rásimderin jetildirýge, saiasi qyzmetti kásibilendirýge, qyzmetkerlerdi yntalandyrýǵa jáne damytýǵa, Prezidenttik jastar kadrlyq rezervi boiynsha júrgiziletin jumystarǵa, sondai-aq, memlekettik qyzmettiń uiymdastyrý mádenietin ózgertýge qatysty atqarǵan jumystarynyń nátijeleri jóninde aitty.
Sonymen qatar Qasym-Jomart Toqaevqa memlekettik qyzmetti tsifrlandyrý, onyń ishinde, «E-qyzmet» júiesiniń integratsiia aiasyn keńeitý jáne «i-Qyzmet» júiesin ázirleý barysy týraly baiandaldy.
Qazaqstan Prezidentine vedomstvo jumysyn qaita uiymdastyrý jaiynda málimet berildi. Anar Jaiylǵanovanyń aitýynsha, byltyr agenttiktiń shtaty 10 paiyzǵa qysqarǵan, al biylǵy aqpan aiynyń sońyna deiin taǵy da 15 paiyzǵa ońtailandyrylmaq.
Qasym-Jomart Toqaev memlekettik qyzmetti jetildire túsý qajettigi týraly atap ótip, Agenttik tóraǵasyna ortalyq jáne jergilikti deńgeidegi memlekettik qyzmetshilerdi qysqartý úderisiniń ashyqtyǵy men tiimdiligin baqylaýdy qamtamasyz etýdi tapsyrdy. Sonymen qatar Prezident Memlekettik basqarý tujyrymdamasyn ázirleý jáne júzege asyrý aiasynda vedomstvonyń jumysyn jandandyrýǵa nusqaý berdi.
