Quryq portyndaǵy mýltimodaldyq kólik habyn tanystyrý sharasynda QR Prezidenti Nursultan Nazarbaev Mańǵystaý oblysy ákimdigi men QR Úkimetine birqatar tapsyrmalar júktedi, dep habarlaidy QazAqparat.
«Búgingi tańda Mańǵystaý oblysy iri kólik-logistikalyq ortalyqqa ainalǵanyn kórip otyrsyzdar. Kaspiidegi eki zamanaýi port birin-biri ózara tolyqtyryp otyrady. Aqtaý qalasy men porttar Qazaqstannyń biregei teńizge shyǵatyn joly men terezesi bolyp sanalady. Sondyqtan memleket qarajatty aiamai, osy jerde qajetti jumystardy uiymdastyrdy. Mańǵystaý oblysynda kóliktiń barlyq túri, iaǵni áýe, temirjol, avtomobil jáne keme kóligi bir jerge toǵysyp otyr. Munyń ózi damýdyń jańa múmkindikterin ashyp, oblys áleýetin arttyrady. Sony tiimdi paidalaný kerek», - dedi N. Nazarbaev.
Sonymen qatar Elbasy óńir basshylyǵy aldyna týrizmdi damytý mindetin júktedi.
«Endigi isteitin sharýamyz týrizmdi damytýǵa qatysty. Osy oraida Kaspii jaǵalaýynda týristerdiń demalýyna tiisti jaǵdailardy jasaý qajet. Sol arqyly halyqtyń áleýeti kóterilýi tiis. Biz munai men gazdan basqa ómir súretin baǵyt joq degen túsinikten basqa jaqqa bet buryp, jastarǵa jańa mamandyqtardy úiretýimiz kerek. Qazir dúniejúzi ekonomikasynyń 60-70 paiyzy - serviste. Sondyqtan jastarymyzdy myna porttarda, joldarda jumys isteýge, kólikterge qyzmet kórsetýge úiretýimiz qajet. Bul jerlerde qyrýar jumys oryndary bar», - dedi Memleket basshysy.
Bul turǵyda Prezident ákimdik pen memleket tiisti jaǵdaidy jasaitynyn atap ótti.
«Kólik-logistika júiesiniń damýy - halyqtyń kózqarasyn ózgertip, jańa kásip túrlerin meńgerýge múmkindik beredi. Sol jańa mamandyqtardy úirený úshin oqý oryndaryn ashýymyz kerek. Jastarǵa munai salasymen qatar, jańa mamandyqtardy meńgertken jón. Ákimdikter eńbek etýshilerdiń indýstriia men qyzmet kórsetýdiń jańa salalaryna beiimdelýin qamtamasyz etýi tiis. Jergilikti atqarýshy organdar oblysta jańa jumys oryndaryn ashyp, shaǵyn jáne orta biznestiń damýyna jaǵdai jasaýy kerek. Úkimetke oblys ákimimen birlesip, mýltimodaldyq habtar - «Quryq», «Aqtaý» porttary tóńireginde qosymsha óndirister men servistik sektorlardy damytýdyń keshendi josparyn ázirleýdi usynamyn», - dep túidi Nursultan Nazarbaev.
.jpeg)