Prezident maqalasynda elimizdiń baǵyt-baǵdary, qoǵamdy alańdatqan ózekti máseleler boiynsha suraqtarǵa naqty jaýap berilgen. QR Parlamenti Senatynyń Tóraǵasy Máýlen Áshimbaev bildirdi, dep habarlaidy "Ult aqparat".
«Memleket basshysynyń «Egemen Qazaqstan» gazetine jariialanǵan «Táýelsizdik bárinen qymbat» atty maqalasyn erekshe yqylaspen oqyp shyqtym. Prezidentimiz búginge deiingi jetistikterimizdi oi eleginen ótkizip, aldaǵy maqsat-mindetterge nazar aýdarǵan eken. Memlekettilikti nyǵaitý, táýelsizdikti saqtaý, ultty ulyqtaý baǵyttary boiynsha tiisti organdarǵa naqty tapsyrmalar da berilgen. Sondyqtan bul eńbekti baǵdarlamalyq qujattyń júgin arqalaǵan dúnie deýge tolyq negiz bar. Maqalada egemen elimizdiń baǵyt-baǵdary, qoǵamdy alańdatqan ózekti máseleler, jahandaný dáýirindegi jańa syn-qaterler boiynsha suraqtarǵa naqty jaýap berilgen. Ásirese, memlekettiń jerine qatysty keltirilgen paiymdar halyq tarapynan tolyq qoldaý tabýda. Memleket basshysy atap ótkendei, shyn máninde, bizge osynaý ulan-ǵaiyr aýmaqty syrttan eshkim syiǵa tartqan joq. Bul jer – ejelden qazaqtyń ata qonysy, qasterli mekeni», - dep jazdy Senat spikeri Facebook paraqshasynda.
Onyń atap ótýinshe, memlekettik tildi damytýǵa, qandastar kóshin ári qarai jandandyrýǵa, shekara mańyndaǵy aýyldardy órkendetýge qatysty aitylǵan usynystar jurtshylyqtyń erekshe qyzyǵýshylyǵyn týdyryp otyr. Oǵan maqala jariialanǵaly beri buqaralyq aqparat quraldary men áleýmettik jelilerde aitylyp, jazylyp jatqan pikirler aiqyn dálel. Naýryz meiramyn atap ótýdiń jańa tujyrymdamasyn daiyndaý bastamasy da halyqtyń bereke-birligin nyǵaitý jolyndaǵy mańyzdy qadam ekeni anyq. Prezidentimizdiń Alash arystarynyń asyl murasyn igerý jalǵasa beretini týraly aitqan sózi de kópshiliktiń kóńilinen shyqqany daýsyz.
«Maqalada jazylǵandai, biyl Táýelsizdigimizdiń 30 jyldyǵymen birge azattyqtyń aq tańyn jaqyndata túsken Jeltoqsan oqiǵasynyń 35 jyldyǵyn atap ótemiz. Halqymyzdyń basynan ótken alapat asharshylyqtyń alǵashqy kezeńi – 1921-1922 jyldardaǵy náýbetten beri de 100 jyl ótti. Sondai-aq, álemdik shejirede teńdessiz sheshim bolyp sanalatyn Semei poligonynyń jabylǵanyna 30 jyl tolady. Munyń bári bizdiń tarihymyz. Al, tarihty dáripteý – barshamyzdyń abyroily mindetimiz. Sol sebepti, Prezidentimiz ultymyzdyń ótkenine táýelsiz kózqaraspen qaraityn kez kelgenin, ǵalymdarymyz ben tarihshylarymyz bul baǵytta aýqymdy jumys atqarý qajettigin naqty atap ótti. Osy oraida Memleket basshysynyń film túsirý isinde tarihi taqyryptarǵa basymdyq berý týraly tapsyrmasynyń mańyzy zor. Jasyratyny joq, biz el, jer, Otan týraly sóilegende keide jalań uranǵa boi aldyryp jatamyz. Prezidentimiz maqalada osy máselege nazar aýdaryp, qazir sózben emes, ispen dáleldeitin kezeń ekenine basa mán bergen. Sonyń ishinde qorshaǵan ortany qorǵaýǵa qatysty aitylǵan oilar tabiǵatty aialaýda ár azamat jaýapty ekenin jáne árkim naqty ispen úles qosý qajettigin anyq kórsetedi», - dedi Máýlen Áshimbaev.
Sonymen qatar ol Qasym-Jomart Kemeluly maqalada saiasi-ekonomikalyq reformalardyń da júieli túrde jalǵasatynyn qadap aitqandyǵyna nazar aýdartady.
«Osy baǵyttaǵy aýyl jáne kent ákimderin sailaý bastamasy elimizde saiasi jańǵyrýdyń jańa kezeńine jol ashady dep senemiz. Prezidentimiz aitqandai, bizdiń maqsatymyz – keler býynǵa Qazaqstandy tuǵyry berik, ekonomikasy qýatty, rýhy asqaq memleket retinde tabystaý jáne sol isterdi laiyqty jalǵastyratyn jasampaz urpaq tárbieleý. Mundai jumystarǵa árqaisymyz atsalysýymyz qajet. Osylaisha, Memleket basshysy atalǵan maqala arqyly memlekettilikti kúsheitýge jáne ideologiialyq jumystarǵa qatysty elimizdiń aldynda turǵan negizgi basymdyqtardy anyqtap berdi. Bul baǵyttaǵy barlyq bastamany tabysty iske asyrý úshin Senat zańnamalyq turǵydan qoldaý kórsetýge, táýelsizdigimizdiń qadir-qasietin arttyrýǵa jáne eldigimizdi eńseli etýge óz úlesin qosatyn bolady», - dedi Senat Tóraǵasy.
.jpeg)