Elbasy Nursultan Ábishulynyń kúni keshe jaryq kórgen «Uly dalanyń jeti qyry» atty maqalasyna qatysty Qazaqstan Respýblikasy Parlamenti Májilisiniń depýtaty, Qýanysh Sultanov joǵary baǵalap, óz pikirin bildirdi.
Jańa maqalanyń aitqany kóp, aitylary odan da kóp. Ár taraýy jan-jaqty saraptaýǵa júk. Eń bastysy - ulttyń rýhani sanasyna jańa serpilis beredi. Solardyń birnesheýine ǵana toqtalsaq.
Birinshiden, Elbasy Nursultan Ábishulynyń jańa maqalasy búgin týa qalǵan dúnie emes. «Uly dalanyń jeti qyry» uzaq jyldarǵy tereńnen qozǵalǵan oi tolǵanysynyń, tolassyz izdenistiń, qajyrly qairatkerlik eńbektiń, el qamy úshin orasan jaýapkershilikpen kósh bastaýshylyq qasiettiń, qiian asýda qiia baspai órkeniettiń óskeleń jolyn taba bilerlik danalyqtyń órshil nátijesi. Osy eńbekte júielengen taqyryptar men tarihi jádigerlik derekter, qubylystar kórinisterin Prezidenttiń bizdiń jańa dáýirimizdegi resmi baiandamalarymen qatar oqýshysymen oi qorytyp, pikir alysý maqsatynda jariialaǵan talai eńbekterinen baiqaý qiyndyq týǵyzbaidy. Tipti, Elbasynyń bastamashyldyǵymen birneshe jyl jemisti júrgizilgen «Mádeni mura» baǵdarlamasynan tys bir jylymyz «Tarih jyly» dep atalǵany da el esinde. Sol siiaqty kóp jumystardyń uzaq jyldar boiyna júrgizilip kele jatqanyn aitsaq ta jetkilikti.
Memlekettik táýelsizdigimizdi jariialap, dúniejúzilik qoǵamdastyqqa múshe bolǵan alǵashqy kúnderden bastap Elbasy bizdiń búgingi memlekettigimizdiń tamyry tereńde jatqandyǵyna, tarih tolqynynda talai-talai syndarly kezeńderden arpalyspen, kúrespen ótip, ulttyń ult bolyp saqtalyp qana qalmai, álemdik órkeniet damýyna óz úlesimizdi qosa alarlyq múmkindigimizdiń mol ekendigine airyqsha mán, mańyz berip kele jatqanyna el, jurt, bizdiń ultymyzdyń táýelsizdik tusyndaǵy ósýi, órkendeýi, jetistikteri aiqyn kýá, ári dálel.
Biz táýelsizdik jyldary táýelsizdigimizge deiingi eki júz jylǵa jýyq merzimde armandap, qol jetkize almai, kózimiz kóre almaǵan múlde jańa jetistikterge qol jetkize aldyq. Bastyǵyrylyp, qursaýlanyp qalǵan ulttyq sanamyz serpilip, sana erkindigine, bostandyǵyna kóterildik. Álemdik teńdikke qol jetkizdik. Kimmen bolsa da terezemiz teń dárejede sóilese alatyn boldyq. Óz daýysymyzdy, sózimizdi basqalarǵa tyńdata alatyn qabylet pen dárejege jettik.
Ekinshiden, maqalanyń árbir taraýy, árbir sózi ult sanasynyń qýattana túsýine jańa mazmun, jańa keńistik, jańa serpin beredi. Iaǵni, árbir azamat óz tarihynyń tereńine boilap, ult teginiń myqtylyǵyna, qabyletine kóz jetkizedi. Ulttyq memleketimizdiń órkeniet keńistigindegi tarihi orny men adamzat qoǵamynyń beibit baǵytta jasampazdyqpen ósip, dami alatynyna airyqsha ekpin berilgen. Elimizdiń ejelgi tarihyn tanyp, zertteý jolynda jańa kózqaras, jańa dúnietanym qalyptastyrý mańyzdylyǵy zaman týǵyzyp otyrǵan qajettilik. Tarihi tamyrymyzdyń tereńdigi men dástúrli myqtylyǵyna senip, búgingi jáne aldymyzdaǵy ymyrasyz básekelestik alapatynda qapy qalmaýymyz jan-jaqty eskertilgen. Talai kezeńderde kósh basynda júrip, jol shetinde qalyp qoimaýdyń qamyn aldymen oilaý mindeti aitylady. Búgingi jasalyp júrgen sharalar bolashaqqa eńbek etedi.
Úshinshiden, osy eńbekte Qazaq jeriniń Túrki áleminiń altyn besigi ekendigine airyqsha mán berilgen. Nursultan Nazarbaev Túrki áleminiń tereń tarihyn maqtanysh ete otyryp, onyń ásirese bolashaq damýymyzdaǵy ornyna basa nazar aýdarady. Ótken tarih rýhani qazynamyz, sonymen birge asyl tek nár alar qainar bulaǵymyz ekenin eskertedi. Elbasynyń: «Tarih pen geografiia túrki memleketteri men uly kóshpendiler imperiialary sabaqtastyǵynyń airyqsha modelin qalyptastyrdy. Bul memleketter uzaq ýaqyt boiy birin biri almastyryp, orta ǵasyrdaǵy Qazaqstannyń ekonomikalyq, saiasi jáne mádeni ómirinde óziniń óshpes izin qaldyrdy.
Orasan zor keńistikti igere bilgen túrkiler ulanǵaiyr dalada kóshpeli jáne otyryqshy órkeniettiń ózindik órnegin qalyptastyryp, óner men ǵylymnyń jáne álemdik saýdanyń ortalyǵyna ainalǵan ortaǵasyrlyq qalalardyń gúldenýine jol ashty», – degen paiymdaýlarynda elimizdiń bolashaǵyna úlken úmit pen mindet artylyp tur. Túrki áleminiń Uly Jibek jolymen jalǵasynda da tolaǵai tabysqa toly igeriler múmkindikterdiń jatqany belgili.
Táýelsiz memleketimiz Nursultan Ábishulynyń bastaýymen, kóregendigimen, jasampazdyǵymen jańa Túrki áleminde de, Resei, Qytai, Úndi taǵy basqa kórshiles eldermen jańa qarym-qatynasta da osy igilikti baǵytty ustana otyryp, tehnologiianyń kóz ilespes jyldamdyǵynda ult sanasyna jańa serpin berip, aldyńǵy qatarly ozyq elder qatarynda bolýǵa shaqyrady.
.jpeg)