Prezident maqalasy memleketimizdiń bolashaq sulbasyn qalyptastyrýda qýatty ideologiialyq negiz bolady – Karin

Memleket basshysy Qasym-Jomart Toqaevtyń maqalasy memleketimizdiń bolashaq sulbasyn qalyptastyrýda qýatty ideologiialyq negiz bolady. Mundai pikirdi QR Prezidentiniń kómekshisi Erlan Karin bildirdi, dep habarlaidy "Ult aqparat".

«Búgin QR Prezidenti Qasym-Jomart Toqaevtyń «Táýelsizdik bárinen qymbat» atty baǵdarlamalyq maqalasy jaryq kórdi. Is júzinde bul maqala Táýelsizdiktiń 30 jyldyǵy jylyn ashyp, osynaý mejeli jylǵa baǵyt berýmen qatar, basty jumystarǵa ekpin beredi. Prezident Qazaqstannyń egemen damýynyń ótken otyz jyldyǵyndaǵy negizgi qorytyndysyn shyǵaryp, jańa kezeńdegi damý basymdyqtaryn aiqyndaidy. Ol tórtinshi onjyldyqtyń basty maqsaty retinde ádil qoǵam men tiimdi memleket qurýdy aiqyndap berdi. Bul rette eldiń kez kelgen jetistigi barsha azamattyń shynaiy igiligimen ólshenýi tiistigine taǵy bir márte basa mán berý Qasym-Jomart Toqaevyń maqalasyna tán. Bul Prezidenttiń Memleket basshysy laýazymyndaǵy barlyq sheshimderine negizdelgen túbegeili senimderiniń biri», - dedi ol. 

Onyń atap ótýinshe, Prezident maqalasynda kóptegen jańa ideia men usynystar bar. Olar gýmanitarlyq ǵylymdy damytý, tarihi sanany qalyptastyrý, memlekettik tildiń róli, etnosaralyq kelisimdi saqtaý jáne jastardy qoldaý syndy salalardy qamtidy. Osy rette Erlan Karin Memleket basshysynyń saiasi jańǵyrý jóninde aitqan sózderine erekshe nazar aýdarady. 

«Prezident reformalardy aqylǵa qonymdy ári júieli júzege asyrý qajettigin erekshe atap ótti. Degenmen, ony soza berýge bolmaityndyǵyn da eksertti. Qasym-Jomart Toqaev bilik halyq aldyndaǵy jaýapkershiligin barlyq ýaqytta sezinýi tiistigine nazar aýdartty. Osyǵan orai Memleket basshysy alǵashqy ret aýyl ákimderin sailaýdan keiin, aýdan ákimderin sailaý ótetindigin aitty. Bul tetik is júzinde óziniń tiimdiligin kórsetetin bolsa, onda kelesi deńgeidegi ákimderdi sailaýǵa kóshý týraly sheshim qabyldanatyn bolady. Shyn máninde bul búgingi maqaladaǵy eń negizgi tezisterdiń biri», - dedi Prezident kómekshisi. 

Sonymen qatar ol memlekettigimizdiń jańa tarihi kezeńindegi Qazaqstan Prezidentiniń maqalasy bolashaqtyń sulbasyn qalyptastyratyn qýatty ideologiialyq negiz bolatyndyǵyn basa aitady.