Foto: Tengrinews.kz
Memleket basshysy Qasym-Jomart Toqaev Atyraý jurtshylyǵymen kezdesýde otandyq biznestiń áleýmettik máselelerdi sheshýge atsalysýyna qatysty pikir bildirdi, - dep habarlaidy "Ult aqparat" Aqordanyń baspasóz qyzmetine silteme jasap.
«Egemen elimizdi órkendetý – bárimizdiń ortaq maqsatymyz. Bul jumysqa túrli sala mamandary, sonyń ishinde isker azamattar da atsalysyp júr. Biznes ókilderi memleketti damytý isinde óte mańyzdy ról atqarady. Men kásipkerlermen kezdeskende biznestiń áleýmettik jaýapkershiligi týraly jii aitamyn. Munyń airyqsha mán-mańyzy bar.
Otandyq biznestiń áleýmettik máselelerdi sheshýge atsalysqany óte durys. Memleket buǵan jan-jaqty qoldaý kórsetedi. Biz «bir jaǵadan bas, bir jeńnen qol shyǵaryp» kúsh jumyldyrsaq qana, elimizdi damyta alamyz» - dedi Prezident.
Ol aldaǵy ýaqytta óńirlerden basqa oblystarǵa "syilyq jasaý" talap etilmeitinin aitty.
«Atyraý óńirinde el ómirine belsene aralasyp júrgen metsenat azamattarymyz barshylyq. Osy oraida, jergilikti kásipkerlerge jáne óńir turǵyndaryna shynaiy rizashylyǵymdy bildirgim keledi. Atyraýlyqtar elordamyzdyń 20 jyldyǵyna tamasha tartý jasaǵanyn búkil el biledi. Esildiń ústine salynǵan bekire balyǵy tárizdi kópir – Astananyń kórkin asha túsken biregei nysannyń biri.
Sol siiaqty Túrkistandaǵy «Uly dala eli» ortalyǵy – Atyraý jurtynyń syiy. Muny memleket te, halqymyz da joǵary baǵalaidy. Árine, basqa aimaqtar da ortaq iske óz úlesin qosyp keledi. Osyndai janashyrlyq pen yntymaqtyń arqasynda eldigimiz nyǵaiady.
Alaida, biz keleshekte aimaqtardan osyndai syilyqtardy talap etpeimiz, árbir oblys meili jańa bolsa da, óz kúshimen, Úkimettiń kómegimen, investorlardyń qoldaýymen óz jumystaryn ózderi atqarýy kerek» - dedi Prezident.
Memleket basshysynyń aitýynsha, ár óńirdegi isker azamattar, eń aldymen, óziniń týǵan jerin kórkeitýge atsalysýy kerek.
«Biz qoǵamda ózara jaýapkershilik ideologiiasyn, metsenattyq qyzmetti dáriptei berýimiz qajet. Munyń bári órkenietti qoǵam qurý úshin óte mańyzdy.
Árkim «Atyraýǵa ákeler me em bir taýdy» dep jyrlaǵan Tabyldy Dosymov siiaqty týǵan jerin súie alsa, týǵan eliniń damýyna úles qossa, Otanymyz órkendei túseri sózsiz. Batys aimaqtarǵa kelgende Áliia, Mánshúk, Hiýaz siiaqty qaharman qyzdarymyz týraly aitpaý múmkin emes. Halqymyz qashanda batyrlaryn baǵalai bilgen. Osy aimaqtaǵy áýejailarymyz qazaqtyń 3 batyr qyzynyń esimimen atalýy – sonyń aiqyn kórinisi.
«Er esimi – el esinde» degen sóz bar. Biz urpaqtyń sanasy sergek bolsyn desek, el úshin erlik jasaǵan ul-qyzdarymyzdyń esimin este saqtaýymyz kerek. Bul – men úshin myzǵymas ustanym» - dedi Toqaev.
