Foto: Aqorda
Memleket basshysy «Qazposhta» AQ basqarma tóraǵasy Ásel Janasovany qabyldady, dep habarlaidy Ult.kz.
Prezidentke kompaniianyń byltyr atqarǵan qyzmetiniń nátijeleri, qarjylyq jaǵdaiy, sondai-aq damýdyń perspektivti baǵyttary týraly esep berildi. Ásel Janasovanyń aitýynsha, sońǵy eki jylda «Qazposhta» taza tabys taýyp, biýdjetke 45 milliard teńge kóleminde salyq jáne baj alymdaryn tóledi.
Qasym-Jomart Toqaevqa kompaniia Dúniejúzilik poshta odaǵynyń reitingisi boiynsha alǵash ret eń úzdik 50 poshta operatorynyń qataryna kirgeni jóninde baiandaldy. Tasymal úderisin ońtailandyrý esebinen poshtalyq jóneltilimderdiń kólemi 26 paiyzǵa ósti. Atap aitqanda, 20 million, sonyń ishinde 9 million halyqaralyq sálemdeme jetkizilgen.
Memleket basshysyna HomePost jobasynyń júzege asyrylý barysy tanystyryldy. Atalǵan bastama aiasynda úi janyndaǵy dúkender aýmaǵynda tapsyrystardy berýge arnalǵan 180 pýnkt ashyldy. Biyl olardyń sany 1 myńǵa jetedi. YTO Express kompaniiasymen yntymaqtastyq sheńberinde poshtalyq infraqurylymdy jańǵyrtýǵa 50 million dollar kóleminde investitsiia tartyldy.
«Qazposhta» AQ basqarma tóraǵasy Prezidentke qyzmet sapasyn jaqsartý maqsatynda engiziletin innovatsiia jaiynda aitty. Osy oraida Japan Post, Toshiba jáne Cainiao kompaniialarymen kólik jáne logistika salalarynda birlesken jobalar júzege asyrylyp jatyr. Budan bólek, halyqaralyq marketpleisterge qoljetimdilikti qamtamasyz etetin Keruen servisi damyp keledi.
Qasym-Jomart Toqaevqa Aqtóbe áýejaiynda mýltimodaldy qoima salý josparlanyp otyrǵany jóninde aityldy. Aýmaǵy 15 myń sharshy metr bolatyn bul nysan Túrkiianyń S-Sistem kompaniiasymen seriktestik negizinde boi kóteredi.
Kezdesý sońynda Memleket basshysy kompaniianyń qarjylyq jaǵdaiyn jaqsartý, elimizdiń TMD-ǵa baǵyttalǵan kólik-logistika áleýetin elektrondy saýda salasynda damytý jáne tsifrlyq sheshimder engizý boiynsha jumystardy jalǵastyrýdy tapsyrdy.
