Foto: Aqorda
Memleket basshysy BUU Bas Assambleiasynyń mereitoilyq 80-shi sessiiasy aiasyndaǵy Jalpy debatta sóz sóileidi, dep habarlaidy Ult.kz.
Prezident birqatar memleket basshylarymen jáne halyqaralyq uiym jetekshilerimen kelissóz júrgizýdi josparlap otyr.
Sapar aiasynda Memleket basshysy Cameco korporatsiiasynyń prezidenti Tim Gittseldi qabyldady.
Prezidenttiń Niý-Iork qalasyndaǵy jumys sapary kanadalyq transulttyq kompaniianyń basshysymen kezdesýden bastaldy. Júzdesýde ýran óndirý salasyndaǵy yntymaqtastyq perspektivasy talqylandy.
Qasym-Jomart Toqaev Cameco «Qazatomónerkásip» ulttyq kompaniiasynyń burynnan kele jatqan senimdi seriktesi ekenin atap ótti. Elimizde qyzmet ete bastaǵannan beri atalǵan kompaniia 500 million dollardan astam investitsiia quiǵan ári tehnologiialar transfertine yqpal etken.
Memleket basshysynyń aitýynsha, Qazaqstan energetikany damytýdyń jańa kezeńine ótip, aldaǵy ýaqytta úsh atom elektr stansasyn salýdy kózdep otyr. Elimiz atom salasynda qoldanylatyn innovatsiialyq tásilderge qyzyǵýshylyq tanytady.
Tim Gittsel Prezidentke «Inkai» birlesken kásipornynyń qazirgi qyzmeti men josparlary jóninde aqparat berdi. Bul kompaniia Túrkistan oblysynda ornalasqan ken ornyn shirek ǵasyrdan beri igerip keledi.
Memleket basshysy Goldman Sachs Global Institute kompaniiasynyń jahandyq máseleler boiynsha prezidenti Djared Koenmen kezdesý ótkizdi.
Qasym-Jomart Toqaev amerikalyq Goldman Sachs jetekshi investitsiialyq bankiniń Qazaqstan Ulttyq bankimen uzaq merzimdi seriktestik ornatqanyn atap ótip, yqpaldastyq deńgeiine joǵary baǵa berdi.
Memleket basshysynyń aitýynsha, tolyq tsifrlyq memleketke ainalýdy kózdeitin Qazaqstan jasandy intellekt, qarjy ekojúiesin tsifrlandyrý salalaryndaǵy yntymaqtastyqqa qyzyǵýshylyq tanytady.
Al Djared Koen Goldman Sachs Digital Asset Platform tsifrlyq qarjy tuǵyrnamasynyń tájiribesine toqtaldy.
Budan keiin Qasym-Jomart Toqaev Educational Testing Service (ETS) kompaniiasynyń prezidenti jáne bas atqarýshy direktory Amit Sevakty qabyldady.
Áńgimelesý barysynda Memleket basshysy ETS kompaniiasynyń bilimdi testileý men baǵalaý salasynda kósh bastap kele jatqanyna erekshe nazar aýdardy.
Prezidenttiń aitýynsha, Qazaqstan bilim berý júiesinde kompaniianyń tájiribesin zerdeleý men paidalanýǵa qyzyǵýshylyq tanytady.
Amit Sevak Memleket basshysyna kompaniianyń halyqaralyq jumys jospary týraly málimet berdi.
Uiym jylyna álemniń 180 eline 50 millionnan asa test ázirleidi ári ákimshilendiredi, sondai-aq ulttyq bilim berý júiesine arnalǵan beiindik sheshimderdi usynady.
