Qashaǵanda qýaty 1 mlrd tekshe metr bolatyn gaz óńdeý zaýyty qurylysy jobasyn qarjylandyrý máselesin shuǵyl sheshý qajet. Bul týraly Prezident janyndaǵy Sheteldik investorlar keńesiniń 34-shi jalpy otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Búginde gaz salasy kómirdi paidalaný deńgeiin tómendetýde mańyzdy ról oinaidy. Qazaqstannyń gazdaný deńgeii 53 paiyzǵa jetti. 10 mln-ǵa jýyq azamat gazǵa qol jetkizip otyr. Eldiń ishinde gazdy qoldaný óte jyldam artyp kele jatyr. Bul birinshi kezekte Almatydaǵy JEO-2 men JEO-3-tiń gazǵa kóshýimen, gaz-himiia kesheni jáne jańa óndiristik kásiporyndardyń iske qosylýymen bailanysty. Kelesi jyldyń ishinde-aq ishki naryqta gaz tapshylyǵy boljanady. Gazben ishki tutynýdy qamtamasyz etý ony eksportqa shyǵarýǵa qaraǵanda sózsiz basym», - dedi Memleket basshysy.
Osyǵan orai Prezident el Úkimetine Teńiz ken ornynyń aktsionerlerimen birlesip, 2 mlrd tekshe metr gazdy eksporttan ishki naryqqa keri baǵyttaý máselesin qarastyrýdy tapsyrdy.
«Sonymen qatar Úkimetke Qashaǵanda qýaty 1 mlrd tekshe metr bolatyn gaz óńdeý zaýyty qurylysy jobasyn qarjylandyrý máselesin shuǵyl sheshý talap etiledi», - dedi Qasym-Jomart Toqaev.
