Qańtar oqiǵasyna qatysy bar kúshtik qurylym ókilderiniń isi údemeli qarqynmen, «qupiialyq» rejiminde jalǵasyp jatyr. Bul týraly QR Prezidenti Qasym-Jomart Toqaev Qazaqstan halqyna Joldaýynda aitty, dep habarlaidy QazAqparat.
«Kúshtik qurylymdar men olardyń sybailastarynyń ózara ymyralasýyna qatysty is boiynsha tergeý qupiia jaǵdaida qarqyndy júrgizilip jatyr. Aldymyzda kýágerlerden jaýap alý, saraptama jasaý jáne túrli málimetterdi zerdeleý siiaqty qyrýar jumys bar.
Bir nárseni naqty aita alamyn: qaskóiler muqiiat oilastyrylǵan aýqymdy operatsiia jasady», - dedi Memleket basshysy.
Onyń aitýynsha, qastandyq uiymdastyrýshylar bul maqsatqa Almaty qalasyn erekshe maqsatta paidalanbaq bolǵan.
«Olar halqymyzdyń jáne shetel qoǵamdastyǵynyń aldynda memlekettiń joǵary basshylyǵynyń abyroiyn tógip, bilikten taidyrýdy kóksedi. Kásibi daiyndyqtan ótken sodyrlardy óz maqsatyna jetý úshin esh qymsynbastan paidalandy. Olarǵa elimizdiń eń iri shahary – Almatyny kúl talqan etýdi, jurtty ábden úreilendirip, dúnieden birjola túńildirýdi, eldegi ahýaldyń byt-shytyn shyǵaryp, bei-bereket qylýdy tapsyrdy.
Sondyqtan kimniń qandai laýazym ielenip otyrǵanyna, qoǵamdaǵy orny qandai ekenine qaramastan osy qaiǵyly oqiǵalarǵa kináli adamdar túgeldei laiyqty jazasyn alatynyna ýáde beremin.
Sol kúnderi qatań ári shuǵyl shara qabyldaýdan basqa amal qalǵan joq. Men eń sheshýshi sátterde elim úshin qolymnan kelgenniń bárin jasadym. Bul – meniń prezidenttik ári perzenttik boryshym», - dedi Qasym-Jomart Toqaev.
