QR Prezidenti Qasym-Jomart Toqaev «Qalamqas» munai-gaz ken ornyndaǵy órtke qatysty Úkimetke tiisti tapsyrmalar júktedi, dep habarlaidy QazAqparat.
«Úkimetke «Qalamqas» ken ornyndaǵy órtti toqtatyp, tótenshe jaǵdaidy qalypqa keltirý jóninde tiisti sharalar qabyldaýdy tapsyrdym. Bul másele - meniń baqylaýymda», - dep jazdy Prezident Twitter-de.
Buǵan deiin habarlaǵanymyzdai, 13 naýryzda Mańǵystaý aýdanyndaǵy «MańǵystaýMunaiGaz» AQ-nyń «Qalamqas» munai-gaz ken ornynda «Si Bý» injenerlik burǵylaý kompaniiasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dispetcherlik qyzmetine «Qalamqas» ken ornyndaǵy uńǵymadan shyqqan gaz janyp, biikti 10 metrge deiin jalyn atqylap turǵandyǵy habarlandy.
Búgin Astanada ótken baspasóz máslihatynda QR Energetika vitse-ministri Bolat Aqsholaqov ken ornyndaǵy jaǵdaiǵa qatysty túsinik berdi.
«MańǵystaýMunaiGaz» AQ dispetcherlik qyzmetiniń habarlaýynsha, 13 naýryz kúni №8237 uńǵymasyn burǵylaýda gaz-sý qospasy atqylaǵan. 13-24 naýryz kúnderi mamandar uńǵymany bor eritindisimen shaiý, ot taralmaý úshin jóndeý jáne oqshaýlaý jumystaryn júrgizdi. 25 naýryz kúni saǵat 17:46-da apatty uńǵyma mańynda gaz-sý qospasynyń oshaǵy órtendi. «Semser órtsóndirýshi» quramy oqiǵa ornyna 17:58-de jetti. Zardap shekkender men qaza bolǵandar joq. 25 naýryzda órtti sóndirý úshin Aqtaýdan taǵy 6 top órt sóndirýshiler, 4 avtotsisterna, jyljymaly sorǵy stansasy jáne gaz sóndiretin avtomobil jetkizildi», - dedi ol.
Onyń aitýynsha, oqiǵa ornyna Mańǵystaý oblysy TJ departamentiniń 12 órt sóndirý tehnikasy men jeke quramynan 53 adam, «Semser órtsóndirýshi», «Fairprotekshn» kompaniialarynyń qyzmetkerleri jumyldyrylǵan.
Sonymen birge búgin shtab óz taktikasyn ózgertetini týraly habarlanǵan.
«№8237 uńǵymanyń da otqa oranýyna bailanysty, órt shyqqan oshaqty oqshaýlaý sheshimi qabyldandy. Sáikesinshe, órtenýi múmkin barlyq qajetti quraldardy alyp shyǵyp, jalyn oshaǵyn joiý qajet», - dedi B. Aqsholaqov.
