Prezident Qasym-Jomart Toqaev Qazaqstannyń halyq jazýshysy Qabdesh Jumadilovtiń otbasy men týystaryna kóńil aitty, dep habarlaidy Aqorda.
Memleket basshysy Qasym-Jomart Toqaev asa kórnekti jazýshy, Memlekettik syilyqtyń iegeri, belgili qoǵam qairatkeri Qabdesh Jumadilovtiń dúnieden ótýine bailanysty kóńil aityp, jedelhat joldady.
«Qabdesh Jumadilulynyń qalamynan shyqqan týyndylar dáýirdiń júgin, zamana kelbetin, qoǵamnyń únin aiqyn kórsete bilgen edi. Sonyń ishinde qily kezeńdi bastan keshken halyqtyń taǵdyryn arqaý etken romandary memleket jáne qalyń kópshilik tarapynan joǵary baǵasyn aldy. Qarymdy qalamger elimizdiń rýhani salasyn damytýǵa mol eńbek sińirdi. Ónegeli ǵumyr keship, sońyna óshpes iz, sarqylmas mura qaldyrǵan Qabdesh Jumadilulynyń esimi men jarqyn beinesi halqymyzdyń júreginde máńgi saqtalady», – delingen jedelhatta.
