Astanada Qazaqstannyń halyq ártisi, kórnekti opera ánshisi Ermek Serkebaevtyń týǵanyna 100 jyl tolýyna arnalǵan «Ǵasyr daýysy» atty mýzykalyq kesh ótti, dep habarlaidy ult.kz.
Memleket basshysy Qasym-Jomart Toqaevtyń mereitoilyq kontsertke qatysýshylarǵa joldaǵan quttyqtaý hatyn QR Premer-Ministriniń orynbasary – Mádeniet jáne aqparat ministri Aida Balaeva oqyp berdi.
Quttyqtaýda Ermek Serkebaevtyń ulttyq ónerdiń órkendeýine ólsheýsiz úles qosqan biregei daryn iesi ekeni aitylǵan. Prezident birtýar tulǵanyń qazaq jáne álemdik operalardyń tańdaýly partiialaryn asqan sheberlikpen oryndap, tól mádenietimizdiń abyroiyn halyqaralyq sahnalarda asqaqtatqanyn aitty.
«Áigili óner perzenti Ermek Serkebaevtyń 100 jyldyǵy IýNESKO kóleminde atalyp ótetin mereitoilar tizimine engizildi.
Ermek Bekmuhameduly birtýar ánshi ári ulaǵatty ustaz boldy. Ol Qurmanǵazy atyndaǵy Qazaq ulttyq konservatoriiasynda uzaq jyl qajyrly eńbek etip, kóptegen shákirt tárbieledi. Osylaisha, qaitalanbas qoltańbasy bar án mektebin qalyptastyrdy.
Dara tulǵanyń ǵasyr toiy – ulttyq merei. Onyń óreli óneri, bekzada bolmysy – óskeleń urpaqqa úlgi-ónege. Sondyqtan, Ermek Serkebaevtai ult perzentiniń esimin ulyqtaý, onyń murasyn dáripteý barshaǵa ortaq mindet ekeni anyq», – delingen Memleket basshysynyń quttyqtaýynda.
Mereitoilyq keshke Ermek Serkebaevtyń otbasy músheleriniń qatysty. Sahnada Murat Serkebaev, Baiǵali Serkebaev jáne Jámilá Serkebaeva óner kórsetti. Bul urpaqtar sabaqtastyǵyn dáripteýdiń, qazaq mýzyka óneriniń tarihynda ózindik qoltańbasyn qaldyrǵan dara tulǵanyń rýhani murasyna kórsetilgen qurmettiń jarqyn kórinisi boldy.
Shyǵarmashyl áýlettiń ókili Murat Serkebaev Memleket basshysynyń mádeniet salasyna kórsetip otyrǵan qoldaýyna rizashylyǵyn bildirip, mereitoilyq keshtiń joǵary deńgeide uiymdastyrylǵanyn atap ótti.
«Búgingi kesh – barshamyz úshin qýanyshqa toly mereke. Ermek Bekmuhameduly – esimi urpaqtan urpaqqa jalǵasqan uly óner iesi. Kontserttiń mazmuny da, uiymdastyrylýy da joǵary deńgeide ótti. Kórermenniń ystyq yqylasy da airyqsha. Mádenietke únemi kóńil bólip, osyndai taǵylymy mol jobalardyń júzege asýyna qoldaý kórsetip otyrǵan Memleket basshysyna shynaiy alǵysymdy bildiremin. Elimizde kórnekti óner qairatkerleriniń esimi ulyqtalyp, olardyń murasy keiingi býynǵa nasihattalyp kele jatqany asa mańyzdy», – dedi Murat Serkebaev.
Óz kezeginde mýzykant ári prodiýser Baiǵali Serkebaev bul keshtiń otbasy úshin ǵana emes, Ermek Serkebaevtyń shyǵarmashylyǵyn qadirleitin barsha jurt pen óner qaýymy úshin de orny bólek ekenin aitty.
«Ákemniń esimin árdaiym maqtanyshpen aitamyn. Ol qazaq óneriniń órkendeýine ólsheýsiz úles qosyp, elimizdi álemge tanytty. Ákemniń shyǵarmashylyq murasyna kórsetilip otyrǵan qurmet úshin Memleket basshysyna shynaiy alǵysymdy bildiremin. Sondai-aq osy kontserttiń joǵary deńgeide ótýine atsalysqan barsha uiymdastyrýshy men óner iesine rizashylyǵymdy jetkizemin. Búgingi kesh óner men rýhaniiat saltanat qurǵan erekshe mereke boldy. Mýzykanttardyń da, kórermenderdiń de erekshe áser alyp, kóńilderi bir serpilip qalǵany sózsiz», – dedi Baiǵali Serkebaev.
Kesh barysynda Ermek Serkebaevtyń repertýaryndaǵy qazaq mýzyka óneriniń altyn qoryna engen shyǵarmalarymen qatar, kópshilik súiip tyńdaityn ánderdiń zamanaýi óńdeýdegi nusqasy oryndaldy.
Mereitoilyq kesh sońynda qatysýshylarǵa Qazaqstan Respýblikasy Prezidentiniń atynan yqylas gúli tabystaldy.
