Eńbekpen qamtylǵandardyń 40 paiyzǵa jýyǵy «kóleńkede» qalyp qoiǵan. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Ekinshi másele – jumyspen qamtý máselesi. Biz jumyspen qamtýdyń jol kartasyn qabyldap, oǵan 1 trillion teńge bóldik. Bul qarjynyń 98,2 paiyzy igerildi. Baǵdarlama halyqty eńbekpen qamtyp, iskerlik belsendilikti qoldaý úshin mańyzdy ról atqardy. Alaida ondaǵan jáne júzdegen myń jumys orny ashylǵany týraly aqparatty teksergende, ol zeinetaqy jáne salyq tólemderimen sáikes kele bermeidi. Azamattardy qaǵaz júzinde ǵana jumysqa ornalastyrý beleń alyp otyr», - dedi QR Prezidenti.
Memleket basshysynyń atap ótýinshe, biryńǵai aqparattyq júiege bir adam týraly málimet qaita-qaita engiziledi.
«Dál osyndai 15 myń jaǵdai tirkelgen. Jumysqa ornalasty degen adamdardyń úshten biri zeinetaqy qoryna qarjy aýdarmaǵan bolyp shyqty. Mundai jaǵdai ásirese Túrkistan 79 paiyz, Qyzylorda 43 paiyz jáne Jambyl oblystarynda 36 paiyz anyqtalyp otyr», - dedi Qasym-Jomart Toqaev.
Jalpy, eńbekpen qamtylǵandardyń 40 paiyzǵa jýyǵy «kóleńkede» qalyp qoiǵan. Men buǵan deiin osyndai esepterdi avtomatty túrde qaita tekserý tásilderin engizý týraly tapsyrma berdim. Alaida Memlekettik kirister komiteti men Biryńǵai jinaqtaýshy zeinetaqy qory bul tapsyrmany áli oryndaǵan joq.
