Memlekettik keńesshi Erlan Qarin Jibek Joly telearnasyndaǵy «Ýáde» baǵdarlamasynda suhbat berdi. Suhbat barysynda ol ortaq ideologiiaǵa, rýshyldyq keseline, Ulttyq quryltai jumysyna, Eltańbany aýystyrý bastamasyna qatysty saýaldarǵa tushymdy jaýap berdi.
Memlekettik keńesshiniń basa aitýynsha, Eltańbany ózgertý – Prezidenttiń usynysy emes. Memleket basshysy óz sózinde «Eltańbany aýystyrýǵa qatysty ártúrli pikirdiń aitylatyndyǵyn, eger qajet bolsa, komissiia quryp talqylaý qajettigin, oń sheshim qabyldansa baiqaý jariialaý kerektigin» ǵana aitqan.
«Memleket basshysy Eltańbany mindetti túrde aýystyrý kerek degen pikir aitqan joq. Ókinishke orai, kópshiligi málimdemeni durys qaramaidy, oqymaidy, tyńdamaidy. Shyn mánisinde, Prezident ol jerde qoǵamda keibir azamattyń Eltańbaǵa qatysty ártúrli pikir aityp júrgenin, máselege qatysty ustanym qalyptassa, onda ashyq túrde talqylaý» kerektigi týraly pikir aitty», - deidi.
Onyń sózine qaraǵanda, Eltańbany aýystyrý máselesin qoǵam belsendileri, qoǵamdyq uiymdar kótergen. Zertteýler de jasalǵan. Munan bólek, Ulttyq quryltaidyń birqatar múshesi de osy máselege ún qosyp, Eltańbadan bólek, aimaqtyq nyshandardy birizdendirý máselesin qozǵaǵan.
«Áleýmettik jeliden kórip júrmin. «Barlyq sharýa qalǵandai, endi Memlekettik eltańbany aýystyrý máselesimen ainalysyp jatyr» degen syndy pikirler bar. Munyń bári jai sóz. Barlyq máseleni ysyryp qoiyp, Eltańbany aýystyrý máselesimen ainalysyp jatqan eshkim joq. Atyraýdaǵy quryltai ótkennen beri biraz ýaqyt ótti. Eshqandai talqylaý, jiyn ótpedi, arnaiy sheshim, qujat qabyldanǵan joq. Pikirtalas qalai júrip jatyr, solai júrip jatyr. Ol – tek qana pikir. Boldy. Sondyqtan da bul bilik tarapynan jasalyp jatqan arnaiy jumys emes. Bul – qoǵamdaǵy pikirtalastyń bir kórinisi ǵana. Máselen, Memlekettik keńesshiniń qyzmetin qaraityn bolsańyz, kóptegen komissiianyń jumysyn úilestirýmen ainalysamyn. Onyń biri – geraldika máselesi. Eger, memleket, bilik keibireýler aityp júrgendei bárin ysyryp qoiyp, Eltańbany aýystyrý máselesimen ainalysatyn bolsa, onda men mindetti túrde geraldika boiynsha komissiia otyrysyn ótkizip, osy máseleni ortaǵa salar edim. Joq, onymen ainalysyp jatqanymyz joq», - dedi Erlan Qarin.
