Qazaqstanda júrgizýshi kýáligin alý emtihandaryn qaita tapsyrý jáne kólikti tirkeý tártibine ózgerister engiziledi. Jańa erejeler artyq rásimderdi qysqartyp, memlekettik qyzmetterdi alýdy jeńildetýge baǵyttalǵan, dep habarlaidy ult.kz Polisia.kz-ke silteme jasap.
Ishki ister ministrliginiń málimetinshe, kólikti qaita jabdyqtaǵannan keiin ony bólek teksertý mindetti bolmaidy. Ózgeristerdiń qaýipsiz ekenin rastaityn qujat usyný jetkilikti.
Sondai-aq júrgizýshi kýáligin alý úshin emtihan tapsyrý tártibi de ózgeredi:
- Eger úmitker emtihannan birinshi ret óte almasa, ony kelesi jumys kúni qaita tapsyra alady.
- Ekinshi ret te sátsizdikke ushyrasa, kelesi áreketke daiyndalý úshin 10 kún beriledi.
Al teoriialyq nemese praktikalyq emtihannan úsh ret óte almaǵan jaǵdaida, sol emtihandy keiin qaita tapsyrý aqyly bolady. Ministrlik bul talap úmitkerlerdiń qosymsha daiyndalýyna múmkindik berý úshin engizilgenin túsindirdi.
Taǵy bir ózgeris boiynsha, teoriialyq emtihannan ótip, praktikalyq emtihannan súringen úmitkerdiń teoriiadan alǵan nátijesi saqtalady.
Sheteldik júrgizýshi kýáligin Qazaqstannyń kýáligine aýystyrý tártibi de ózgeredi. Ol úshin aldymen teoriialyq emtihan tapsyrý qajet. Budan bólek, ýákiletti organ júrgizýshi kýáligin bergen elge resmi suraý joldaidy. Qujattyń túpnusqalyǵy sol eldiń quzyretti organy rastaǵannan keiin ǵana kýálik aýystyrylady.
IIM Ákimshilik politsiia komiteti basqarmasy bastyǵynyń orynbasary Aqtoty Boranovanyń aitýynsha, bul talaptar jalǵan qujattardyń qoldanylýyna jol bermeýge jáne memlekettik qyzmetterdi alý rásimderin ońtailandyrýǵa baǵyttalǵan.
