Aqyn ári jýrnalist Janna Eleýsiz dúnieden ozdy. Bul týraly Qazaqstan Jazýshylar odaǵy málimdedi, dep habarlaidy ult.kz.

Janna Eleýsiz 1970 jylǵy 22 qarashada Aqtóbe qalasynda týǵan. 1992 jyly Qazaq memlekettik ulttyq ýniversitetiniń jýrnalistika fakýltetin bitirgen.

Qazaq ádebietinde syrshyl óleńderimen tanylǵan aqynnyń «Men súietin dúnie», «Tirshilik trilogiiasy» atty jyr jinaqtary jaryq kórdi. Onyń shyǵarmalaryna tereń oi, názik sezim men muń tán. Ádebi ortada aqynnyń osyndai qoltańbasyn «aqsúiek poeziia» dep baǵalaǵan.

1995 jyly Abaidyń 150 jyldyǵyna orai uiymdastyrylǵan músháirada júldeger atanǵan.

Qazaqstan Jazýshylar odaǵy aqynnyń otbasy men jaqyndaryna jáne oqyrmandaryna kóńil aitty.

Janna Eleýsiz kim? 
 

Janna Eleýsiz aýdandyq «Shalqar» gazetinde tilshi bolyp jumys istegen. Onyń óleńderi Aqtóbe óńiri qalamgerleriniń «Jádiger» ádebi antologiiasyna jáne «Aqtóbe kitaphanasy» seriiasymen jaryq kórgen 50 tomdyqqa engen.

Aqynnyń shyǵarmashylyǵyn qalamgerler Meiirhan Aqdáýlet, Ertai Ashyqbaev jáne Aiagúl Mantai arnaiy taldaǵan. Meiirhan Aqdáýlet ony ádebiettegi «jeke qubylys» dep baǵalap, ózin jarnamalaýǵa umtylmaitynyn aitqan. Sondai-aq Jannany Fariza Ońǵarsynovaǵa ótinish aityp, Astanaǵa áreń aparǵanyn eske alǵan.

Janna Eleýsizdiń poeziiaǵa qatysty ózindik ustanymy bolǵan. Baǵashar Tursynbaiulymen áńgimesinde ol qazaq óleńinde oi men sezimniń qaitalana beretinin aityp, ótken ǵasyrdyń basyndaǵy orys poeziiasyndaǵy túrli aǵymdardyń tartysyna qyzyǵatynyn jetkizgen. Aqyn óleńde oqyrmandy eliktirýden góri salqyndyqty jaqyn kóretinin aitqan.

Ertai Ashyqbaev onyń jyrlaryndaǵy dara minez ben erekshe beinelerge nazar aýdarǵan. Qalamger Jannanyń poeziiasyn adamdy beiqamdyqtan saqtandyratyn, álsizge arasha túsip, jannyń aýyrtpalyǵyn jetkizetin óleńder retinde sipattaǵan.