Prezident Qasym-Jomart Toqaev Alataý qalasyn damytýǵa arnalǵan jiynda el ishinde aitylyp júrgen “Shtrafstan” ataýyna qatysty pikir bildirip, mundai sózderdi qoldanatyn keibir depýtattardy synǵa aldy, dep habarlaidy ult.kz.
Aqordanyń jazýynsha, Memleket basshysy óz sózinde “Taza Qazaqstan” tujyrymdamasynyń mańyzyn atap ótip, eldi kógaldandyrý, qalalar men aýyldardy kórkeitý, ekologiialyq mádenietti arttyrý – memleket saiasatynyń mańyzdy baǵyty ekenin aitty.
– Qalalar men aýyldardy kórkeitýge, tabiǵatty qorǵaýǵa erekshe mán berý qajet. Týristik oryndardaǵy tártip pen jaýapkershilik te nazardan tys qalmaýy kerek. Vandalizmmen kúres zań aiasynda júrgizilýi tiis. Quqyqtyq nigilizmge qoǵam bolyp qarsy turýymyz qajet, – dedi Prezident.
Toqaevtyń aitýynsha, zańǵa qurmet kórsetý – tek jazadan qorqý emes, ol azamattyq jaýapkershiliktiń kórinisi.
Prezident qazirgi kúrdeli geosaiasi jaǵdaida elge eń aldymen turaqtylyq pen birlik qajet ekenin de erekshe atap ótti. Onyń sózinshe, bul bolmasa, eshqandai reforma nátijeli bolmaidy.
– Keibir azamattar, sonyń ishinde Parlament ókilderi de bar, eldi “Shtrafstan”, “Aiyppulstan” dep atap júr. Bul – durys kózqaras emes. Biz quqyqtyq tártipti nyǵaitý jolynan taimaimyz. “Zań men tártip” qaǵidasy – qoǵamnyń suranysy, – dedi Memleket basshysy.
Prezident bul baǵyttaǵy saiasattyń jalǵasatynyn jáne qoǵamdyq qaýipsizdik pen tártip memleket úshin basymdyq bolyp qala beretinin aitty.
