Memleket basshysy Qasym-Jomart Toqaev aldaǵy eki aptada Úkimet múshelerine dári-dármek boiynsha turaqtandyrý qorlaryn belgilengen normativke sáikes jasaqtaýdy tapsyrdy, dep habarlaidy "Ult aqparat".
«Ekinshi másele. Biz jaz ailarynda dári-dármek tapshylyǵyn aiqyn sezindik. Meniń tapsyrmam boiynsha naqty jumys atqaryldy. Atap aitqanda, eki aiǵa jetetin qor jasaqtalyp, eń qajetti degen dári-dármektiń tizimi ulǵaityldy. Ony syrttan ákelý jáne tirkeý tártibi jeńildetildi. Biraq, óńirlerde dári-dármekterdi turaqtandyrý qorlarynyń kólemi jáne daiyndyq jumystary birkelki emes. Mysaly, Batys Qazaqstan jáne Aqtóbe oblystarynda – eki júz million teńgeden. Mańǵystaý oblysynda – úsh júz million teńge. Al, Nur-Sultan qalasynda bir milliard alty júz million teńge, Almatyda – bes milliard teńge», - dedi Prezident koronavirýs indetiniń ekinshi kezeńine daiyndyq máseleleri boiynsha keńeste sóilegen sózinde.
Memleket basshysy Densaýlyq saqtaý ministrliginiń óńirlerdegi daiyndyq barysyna bergen baǵasymen tanysqanyn jetkizdi. Soǵan sáikes, Mańǵystaý jáne Almaty oblystarynda emhanalar men aýrýhanalardyń daiyndyǵy nashar ekendigi anyqtalyp otyr. Osy olqylyqtardy Úkimet pen ákimder dereý túzetýge mindetti.
«Úkimetke ákimdermen birlesip, eki apta ishinde turaqtandyrý qorlaryn belgilengen normativke sáikes jasaqtaýdy jáne meditsina infraqurylymynyń tolyq daiyn bolýyn qamtamasyz etýdi tapsyramyn», - dedi ol.
