Memleket basshysy Qasym-Jomart Toqaev Ortalyq Aziiaǵa sapary aiasynda Qazaqstanǵa kelgen BUU Bas hatshysynyń birinshi orynbasary Amina Muhammedti qabyldady, dep habarlaidy Aqordanyń baspasóz qyzmeti.
Kezdesý barysynda Qazaqstan men BUU arasyndaǵy yntymaqtastyqtyń basym baǵyttary qarastyryldy. Ornyqty damý maqsattaryna qol jetkizý, klimattyń ózgerýine qarsy kúres, pandemiiaǵa qarsy is-qimyl jáne genderlik teńdik pen adam quqyqtaryn qamtamasyz etý jónindegi birlesken kúsh-jigerge erekshe nazar aýdaryldy.
Qasym-Jomart Toqaev Amina Muhammedke iltipat bildire otyryp, laýazymdy qyzmetke qaita sailanýymen quttyqtady. Onyń bul sapary elimizdiń tarihyndaǵy betburys kezeń – jalpyulttyq referendým ótkizýmen tuspa-tus kelgenin atap ótti. Sondai-aq referendým qorytyndylary Jańa Qazaqstandy qurý isine kirisýge múmkindik beretinin aitty.
Prezident kópjaqtylyq qaǵidaty men halyqaralyq diplomatiiany qalyptastyryp, damytýda dúniejúzilik uiymnyń erekshe ról atqaratynyn atap ótti. Qasym-Jomart Toqaev Qazaqstannyń BUU-men aradaǵy yntymaqtastyqty odan ári jan-jaqty nyǵaitýǵa beiildi ekenine toqtalyp, onyń jahandyq problemalardy sheshý jónindegi kún tártibin tolyq qoldaitynyn jetkizdi.
Qazaqstan Prezidenti BUU Bas hatshysy Antoniý Gýterrishtiń beibitshilik pen jahandyq qaýipsizdik máseleleri jónindegi jańa kún tártibin ázirleý úshin 2023 jyly joǵary deńgeidegi «Bolashaqtyń sammitin» shaqyrý týraly bastamasyn quptady.
Memleket basshysy qazirgi zamannyń kúrdeli syn-qaterleri jaǵdaiynda ornyqty damý salasyndaǵy maqsattarǵa qol jetkizý úshin kezek kúttirmeitin jáne aýqymdy sharalar qabyldaýdyń mańyzdy ekenin atap ótti.
Sonymen qatar Memleket basshysy azyq-túlik qaýipsizdigin qamtamasyz etý, muqtaj elderge gýmanitarlyq kómek kórsetý úshin Qazaqstan tarapynan qabyldanyp jatqan sheshimder týraly aitty.
Qasym-Jomart Toqaev áielder men qyzdarǵa qatysty zorlyq-zombylyqtyń barlyq túrin joiý jónindegi Ortalyq Aziia men Aýǵanstanǵa arnalǵan SpotLight Initiative óńirlik baǵdarlamasyn júzege asyrý isindegi Amina Muhammedtiń kóshbasshylyǵyn joǵary baǵalady.
Óz kezeginde Amina Muhammed Memleket basshysyna BUU Bas hatshysynyń júrekjardy sálemin jetkizdi. Sondai-aq Qasym-Jomart Toqaevtyń basshylyǵymen elimizde júzege asyrylyp jatqan aýqymdy reformalardy qoldaitynyn aityp, referendýmnyń sátti ótýimen quttyqtady.
BUU Bas hatshysynyń birinshi orynbasary Qazaqstan men BUU-nyń 30 jyl ishinde ornatqan kópjaqty seriktestiginiń deńgeiine joǵary baǵa berdi.
Sonymen qatar áńgimelesý barysynda Aýǵanstan máselesi qarastyryldy. Amina Muhammed Aýǵanstandy áleýmettik-ekonomikalyq turǵydan qaita qalpyna keltirýge bailanysty problemalardy sheshýde halyqaralyq kúsh-jigerdi jandandyrýdyń mańyzdy ekenin aitty.
