Qazaqstannyń strategiialyq maqsaty – myqty jáne jaýapty jeke biznesti qurý. Bul týraly QR Prezidenti Qasym-Jomart Toqaev otandyq biznes ókilderimen kezdesýinde aitty, dep habarlaidy QazAqparat.
«Biznesti qorǵaý tetikterin kúsheitý jónindegi qadamdardan basqa, tartymdy investitsiialyq ahýal qalyptastyrýǵa da erekshe nazar aýdarý qajet. Jahandyq týrbýlenttik pen belgisizdik, syrtqy jáne ishki syn-qaterlerdiń kúsheiýi kezinde, ádette memlekettiń róli kúsheie túsedi. Alaida, bizdiń strategiialyq maqsatymyz - árqashan myqty jáne jaýapty jeke biznesti qurý bolyp qala beredi», - dedi Prezident.
Memleket basshysynyń aitýynsha, qýatty jáne turaqty naryqtyq ekonomika qurý úshin árkelki básekelestik faktorlaryn anyqtaý jáne joiý boiynsha júieli jumys qajet. Onyń týyndaý táýekelderi memlekettik qoldaý sharalarynyń tiimsiz rásimderinde jatyr. Bul salyq jeńildikterine, jer telimderin bólýge, memlekettik satyp alýlarǵa jáne jalpy ákimshilik retteýge qatysty.
«Mysaly, qazir shaǵyn jáne orta biznes úshin jerge qol jetkizýdiń birden-bir tásili - áleýmettik-kásipkerlik korporatsiialardyń mindetti qatysýymen investitsiialyq jobalardy iske asyrý bolyp otyr. Basqasha aitqanda, óndiristiń negizgi faktorymen birge, kásipkerge memlekettiń qatysýy májbúrli túrde tańylady. Biznes jer telimin jalpy negizde alý múmkindiginiń joqtyǵyna shaǵymdanady. Bul máseleniń júieli sheshimi – jer resýrstarynyń ashyq kartasyn jasaý dep te boljandy. Biraq, bul baǵyttaǵy jumys óte baiaý júrip jatyr. Qoldanystaǵy elektrondy resýrs paidalanýshylar úshin yńǵaisyz, derekterdiń ózektiligi máselesi basy ashyq kúiinde qalyp otyr, basqa júielermen integratsiia joq. Úkimet bul máseleni airyqsha baqylaýǵa alýy kerek», - dedi Q. Toqaev.
Bul jobany tiimdi iske asyrý - kelesi qadamǵa ótýge, iaǵni jer alýǵa ótinim berý men qaraýdyń avtomattandyrylǵan tetigin engizýge jedel kóshýge múmkindik beredi. Prezident mundai júieni jyl sońyna deiin iske qosý qajettigin aitty.
«Básekeli naryqtarda baǵa shekteýlerin qoldaný máselesi erekshe nazar aýdarýdy talap etedi. Baǵa shekteýleri azyq-túlik, dári-dármek jáne basqa da bólshek saýda naryqtarynda belsendi qoldanyla bastady. Múmkin dál qazir, bizdiń damýymyzdyń kúrdeli kezeńinde bul qajet te shyǵar. Biraq, Úkimet baǵany retteýdiń naryqtyq tetikterin qoldaný jóninde oilanýy kerek. Qoryta aitqanda, barlyq salalarda básekelestikti jedel qarqynmen kúsheitý kerek. Jalǵan qadaǵalaý joly jalpy tapshylyqqa jáne taýarlar sapasynyń tómendeýine ákelýi múmkin. Tepe-teńdik qajet. Básekege qabiletti taýar naryqtarynyń shamadan tys baǵalyq rettelýi eldi jeke investitsiialardan aiyrady», - dedi Qasym-Jomart Toqaev.
