Jyraqta oqýda júrgen jastarymyzdan aiyrylyp qalamyz dep ýaiymdaýdyń jóni joq. Qazaqstan Respýblikasynyń Prezidenti Qasym-Jomart Toqaev «Táýelsizdik bárinen qymbat» atty maqalasynda osylai málim etti, dep habarlaidy "Ult aqparat".
«Jahandaný zamanynda aidai álem alaqandaǵydai bolyp qaldy. Talapty ul-qyzdarymyzdyń jer júzindegi kez-kelgen elge baryp, bilim alýy qalypty úrdiske ainaldy. Sonda qalyp, qyzmet istep júrgender de az emes. Osy oraida, el ishinde jastar shetelge ketip jatyr degen alańdaýshylyq bar. Men jastarymyz bilimin jetildirip, báribir elge oralady nemese shetelde júrip-aq Qazaqstannyń múddesin qorǵaidy dep senemin», - dedi Memleket basshysy maqalasynda.
Prezident halqymyzda «Atyń barda jer tany, jelip júrip» degen sóz baryn, kezinde Elbasy bozbala shaǵynda Ýkrainaǵa attanyp, eńbek, bilim jáne ákimshilik daǵdylaryna ie bolǵanyn, ózi de bilim qýyp Máskeýge sapar shegip, ózge memleketterde jumys istegenin esine alady.
«Bizdiń talai zamandastarymyz búgingi jastar siiaqty alys shetelderge bara almasa da, Keńes Odaǵynyń túrli qalalarynda bilim aldy. Biraq, basym kópshiligi tamyrynan ajyrap, ol jaqta birjola qalyp qoiǵan joq. Elge kelip, eńbek etti. Sondyqtan jyraqta júrgen jastarymyzdan aiyrylyp qalamyz dep ýaiymdaýdyń jóni joq. Bizdiń mindetimiz – olardyń boiyna memleketshildik rýhyn sińirip, qai jerde júrse de týǵan eldiń igiligine qyzmet etýge jumyldyrý. Mysaly, álemniń eń damyǵan elderinde óz kásipterin bastaǵan jáne alpaýyt kompaniialarda jumys istep júrgen azamattarymyzdyń osyndaǵy zamandastarymen bailanysyn nyǵaityp, tálimgerlik etýine jaǵdai jasaýymyz kerek», - deidi Qasym-Jomart Toqaev.
Prezident sonymen qatar daryndy jastardyń bári shetelde júrmegenin aityp ótti. El ishinde de bilikti ári bilimdi órender jetip artylady.
«Biz olardy basshylardyń jańa býynyn daiyndaýǵa barynsha tartyp jatyrmyz. Meniń bastamammen qurylǵan Prezidenttik kadr rezervi – osynyń aiqyn dáleli. Jobanyń kelesi kezeńinde qoǵam múddesine adal kóshbasshylardy irikteýge erekshe nazar aýdaramyz. Bilik organdaryndaǵy azamattar, eń aldymen, ulttyq múddege berik bolýǵa tiis. Biz ne istesek te, bárin keler urpaq úshin jasaimyz. Memlekettik saiasattyń bolashaq aldyndaǵy jaýapkershiligin tereń sezinemiz. Bul ustanymnan eshqashan ainymaimyz. Eń ǵajaiyp erlikter Otanǵa sheksiz súiispenshilikten týyndaityny sózsiz. Shyn otansúigishtik degenimiz – jalań uran tastaý emes, elińe, halqyńa qyzmet etý», - dedi ol.
