QR Prezidenti Qasym-Jomart Toqaev «Qazaqstan» telearnasyna bergen suhbatynda qańtar tragediiasy kezinde beibit mitingini tártipsizdikke ulastyrǵandardyń qaidan paida bolǵanyn aitty, dep habarlaidy QazAqparat.
«Men osy suraqqa birneshe ret jaýap berdim. Munyń aldyn ala josparlanǵan áreket ekeni anyqtaldy. Arnaiy daiyndyqtan ótken qylmystyq toptar, lańkester oqiǵanyń bel ortasynda júrip, qaraqshylardy, quqyq buzýshylardy basqardy. Árine, buzaqy toptardyń arasynda beibit azamattar da boldy», - dedi Memleket basshysy.
Onyń aitýynsha, arandaýǵa ergen beibit sherýshilerdi lańkesterden, qaraqshylardan bólip alýymyz kerek.
«Bul – óte kúrdeli másele. Munyń bárin tergeý jumystary anyqtaidy. Jalpy, myna nárseni durys túsinýimiz kerek. Alańda shyqqandardyń bárin túgel beibit sherýshi dep aitýǵa bolmaidy. Bul eshqandai aqylǵa syimaityn nárse. Kózi ashyq, ary taza adam mundai jalǵan tujyrymǵa eshqashan senbeidi.
Eń aldymen, lańkester jaǵdaidy ýshyqtyrdy. Olardyń maqsaty – eldiń tutastyǵyn buzý, halyqty qorqytý. Al, beibit sherýshiler solardyń qarmaǵyna tústi. Qazir sol kinásiz azamattardyń quqyǵyn qorǵaýymyz kerek. Men árbir is boiynsha muqiiat tergeý júrgizý kerek dep aittym. Adamdardyń quqyǵyn buzǵan tulǵalar jazaǵa tartylady. Biz buǵan qajetti sharanyń bárin qabyldaimyz. Esh kúmán bolmasyn», - dedi Prezident.
