Prezident Qasym-Jomart Toqaev Aýyl sharýashylyǵy ministri Saparhan Omarovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna elimizdegi agroónerkásip kesheniniń qazirgi jaǵdaiy jáne biylǵy 9 aidyń ishinde ministrlik atqarǵan jumystardyń qorytyndysy týraly esep berildi.
Aýyl sharýashylyǵy ministri jyl basynan beri aýyl sharýashylyǵyndaǵy ishki ónimniń kólemi 5 paiyzǵa artyp, 4,4 trillion teńgeni quraǵanyn, al azyq-túlik ónimderi 3,5 paiyzǵa, iaǵni 1,4 trillion teńgege deiin ulǵaiǵanyn habarlady. Sondai-aq ministr aýyl sharýashylyǵynyń negizgi kapitalyna jáne azyq-túlik óndirisi salasyna tartylǵan investitsiialardyń kólemi 15 paiyzdan artyp, 445 milliard teńgeden asqanyn aitty.
Saparhan Omarov Qasym-Jomart Toqaevqa importty almastyrý saiasatyn júzege asyrý barysy týraly málimet berdi. Ministrdiń aitýynsha, búginde taýardyń alty baǵyty boiynsha importqa táýeldilik baiqalady. Úkimet bekitken josparlardy oryndaý arqyly úsh jyl ishinde importty almastyrý máselesin sheshýge bolady.
Sonymen qatar Prezidentke qus tumaýynyń taralýyna qatysty problemanyń sheshilgeni týraly aityldy. Ministr usynǵan málimetterge sáikes atalǵan aýrýdyń taralýy tolyǵymen joiylǵan, qustardyń ólim-jitimi boiynsha tólenetin ótemaqy máselesi tiisti vedomstvonyń baqylaýynda tur.
Aýyl sharýashylyǵy ministri aldaǵy bes jyldyqta agroónerkásip keshenin damytýdyń Ulttyq josparyn ázirleý barysy týraly baiandady. Atalǵan jobany iske asyrý ishki naryqty áleýmettik mańyzy bar azyq-túlik taýarlarymen qamtamasyz etýge múmkindik beredi.
Kezdesý sońynda Qasym-Jomart Toqaev Saparhan Omarovqa qaita óńdelgen ónim eksportyn arttyrýǵa, aýyl sharýashylyǵyndaǵy eńbek ónimdiligin joǵarylatýǵa, elimizdiń sharýalary óndirgen taýarlar úshin jańadan ótkizý naryqtaryn ashýǵa jáne veterinariia salasyndaǵy baqylaýdy kúsheitýge qatysty birqatar tapsyrma berdi.
