Biylǵy 1 shildede Qazaqstan Respýblikasynyń jańa Konstitýtsiiasy kúshine enedi. Osy tarihi data qarsańynda Almaty qalasynda QR Premer-ministriniń orynbasary – Mádeniet jáne aqparat ministri Aida Balaeva etnomádeni birlestikterdiń ókilderine Memleket basshysy joldaǵan jańa Konstitýtsiianyń arnaiy basylymdaryn tabystady.
Is-sharaǵa qatysýshylardyń árqaisysyna Prezidenttiń haty men Konstitýtsiia danasy usynyldy. Óz hatynda Memleket basshysy jemisti eńbegi jáne Ádiletti Qazaqstandy qurýǵa qosqan úlesi úshin shynaiy rizashylyǵyn bildirgen.
«Konstitýtsiiada bekitilgen myzǵymas qundylyqtar el igiligin arttyryp, qoǵamnyń turaqty damýyna jol ashady dep senemin. Memleketimiz nyǵaiyp, qasterli Otanymyz ósip-órkendei bersin!» – delingen Prezident hatynda.
Jiynda Úkimet basshysynyń orynbasary Ata Zańda Qazaqstan qoǵamynyń irgeli qundylyqtary kórinis tapqanyn atap ótti.
«Konstitýtsiianyń preambýlasynda búkil qoǵam úshin airyqsha mánge ie negizgi qundylyqtar men ustanymdar aiqyndalǵan. Olardyń qatarynda Ádiletti Qazaqstan ideiasy, «Zań men tártip» qaǵidaty, adam men azamattyń quqyqtary men bostandyqtaryn múltiksiz saqtaý, el birligi men qoǵamdyq yntymaq, etnosaralyq jáne konfessiiaaralyq kelisim bar. Bul qundylyqtar beibitshilik, syilastyq pen qoǵamdyq senim ornyqty damýdyń berik negizine ainalǵan elimiz úshin erekshe mańyzdy. Konstitýtsiia memlekettik institýttarǵa ǵana emes, árbir azamatqa, árbir qoǵamdyq birlestikke, óziniń adal eńbegimen jáne belsendi qyzmetimen Qazaqstan halqynyń birligin nyǵaitýǵa úles qosyp júrgen barsha qaýymǵa arnalǵan», – dep atap ótti Premer-ministrdiń orynbasary.
Aida Balaeva «Qazaqstan Halyq Keńesi» konsýltativtik-keńesshi institýtynyń qurylýyna da arnaiy toqtaldy. Onyń quramynyń úshten birin elimizdiń etnomádeni birlestikteriniń músheleri quraidy. Qalǵan oryndar kommertsiialyq emes uiymdar men máslihat ókilderi arasynda teńgerimdi túrde bólinedi.
Osylaisha, Qazaqstan Halyq Keńesi halyq únine qulaq asatyn ári Ádiletti memleket qaǵidattaryna negizdelgen syndarly qoǵamdyq dialogty qalyptastyrýǵa yqpal etetin múlde jańa ári biregei institýt bolmaq.
Eske sala keteiik, 15 naýryzda ótken respýblikalyq referendýmda Qazaqstannyń jańa Konstitýtsiiasy qabyldandy. Jańa redaktsiiada Ádiletti Qazaqstannyń negizgi qundylyqtary men «Zań men tártip» qaǵidaty bekitilip, adam quqyqtary men bostandyqtaryn qorǵaý kepildikteri kúsheitildi. Qujattaǵy basty jańashyldyqtardyń qatarynda bir palataly Parlament – Quryltaidyń jáne Qazaqstan Halyq Keńesiniń qurylýy bar.
