Foto: Instagram.com
Qazaqstan Respýblikasynyń Prezidenti Qasym-Jomart Toqaev áleýmettik jelidegi paraqshasynda búgingi Analar kúni merekesimen barlyq qazaqstandyq analardy quttyqtap, óz anasy – Turar Shabarbaeva týraly esteligin jazdy, dep habarlaidy Ult.kz.
«Tórt balaly bizdiń otbasy qarapaiym turdy. Anam uzaq ýaqyt boiy belgili sebeptermen jumys istemedi, ol kisi úi jumysyn atqardy.
Sheshei ol kezde jas áiel bola tura, kóp nárseden, onyń ishinde áshekei zattar men qymbat kiimderden tartynatyn. Árine, sándi kiinip, ásem áshekeiler taqqysy kelgeni tabiǵi ǵoi, alaida bar ómirin perzentterine arnap, analyq paryzyn qysqa ǵumyrynyń aqyryna deiin atqaryp ótti. Tipti, qymbat dúnieler alatyndai múmkindik týǵan kezde de, ózine unaǵan zattardy nemerelerine áperýmen shekteletin.
Óz ómirimniń Keńes Odaǵy taraýymen tuspa-tus kelgen syndarly sátinde anamnyń batyl qoldaǵany eshqashan umytylmaidy. Sol bir qaýyrt kúnderi Máskeýde qalyp, Resei memleketiniń Syrtqy ister ministrliginde qyzmet isteý nemese elge qaityp oralýdy anyqtaý qajet edi. Sonda anamnyń «Ákeń tiri bolsa, saǵan birden Qazaqstanda qyzmet etý kerek der edi» dep aitqany esimde. Bul sóz buiryqtai bolyp estildi», - dep jazdy Memleket basshysy óz esteliginde.
