Qazaqstan Prezidenti Qasym-Jomart Toqaev eldegi tártipsizdikterdi jaqsy daiyndyqtan ótken kásibilerdiń shabýyly dep baǵalady, dep habarlaidy QazAqparat.
«Almaty men ózge qalalarda naǵyz shaiqas boldy. Máselen, Almatyda politsiia departamentiniń ǵimaraty mańyndaǵy urys 2 túnge sozylǵan. Politseiler terroristerdiń shabýylyna toitarys berdi. Bir ǵana Almatyda 7 qarý dúkeni basyp alynǵan. Bul – jaqsy daiyndyqtan ótken kásibilerdiń, onyń ishinde arnaiy vintovkalary bar snaiperlerdiń áreketi», - dedi Qasym-Jomart Toqaev Ujymdyq qaýipsizdik týraly shart uiymynyń kezekten tys otyrysynda.
Prezident terroristerdiń jeke bailanys quraly bolǵanyn, olardyń áskeriler men quqyq qorǵaýshylardyń formasyn kigenin atap ótti.
«Olar arsyz túrde jappai tártipsizdik qatysýshylarynyń arasyna jasyrynyp, tiri qalqan retinde qoldandy. Politseiler men áskeri qyzmetshilerge sany boiynsha bes ese kóp banditter shabýyl jasady, olardy asqan qatigezdikpen azaptady, eki politsiia qyzmetkeriniń basy kesildi. Aýrýhanalarǵa da varvarlyq shabýyldar boldy. Memleket resýrsyn túgesý úshin shabýyl uiymdastyrýshylar úlken maidan ashty. Agressiia bir ýaqytta 11 óńirdi qamtydy», - dedi Memleket basshysy.
Aita keteiik, búgin UQShU Ujymdyq qaýipsizdik keńesiniń kezekten tys sessiiasy ótti. Jiyn Qazaqstan tarapynyń bastamasymen shaqyryldy.
