Qarjyny jáne járdemaqyny negizsiz, ońdy-soldy taratýdy doǵarý qajet. Bul týraly Nur Otan partiiasynyń kezekten tys XX Sezinde QR Prezidenti Qasym-Jomart Toqaev aitty, dep habarlaidy "Ult aqparat".
«Bizdiń baǵdarlamamyzda negizgi 4 basymdyq bar. Birinshi - ár azamatqa óz áleýetin júzege asyrý úshin teń múmkindik berý. Biz áleýmettik-ekonomikalyq saiasatta naryq tásilderin basshylyqqa alamyz. Qarjyny jáne járdemaqyny negizsiz, ońdy-soldy taratýdy doǵarý qajet. Memleket ataýly kómekti shyn máninde muqtaj adamdarǵa berý kerek. Eń bastysy - áleýmettik ádildik», - dedi QR Prezidenti.
Memleket basshysy sol sebepti muqtaj jandarǵa qamqorlyq jasaýǵa basa mán beriletindigin aitty.
«Áleýmettik saiasatty júrgizgende qiyndyqqa tap bolǵan azamattarǵa ataýly kómek kórsetý sharalary kúsheitiledi. Aldaǵy 5 jyl ishinde áleýmettik tólemderdi jyl saiyn indeksteý úshin 3 trln teńgeden astam qarajat bólinedi. Ortaq zeinetaqy mólsheri de jyl saiyn indeksteletin bolady. Bul rette biz muny infliatsiia deńgeiine 2 paiyz qosyp júzege asyrýdy usynyp otyrmyz», - dedi Qasym-Jomart Toqaev.
