Foto: Aqorda
Memleket basshysy Qasym-Jomart Toqaev aldaǵy Ustazdar kúnine orai quttyqtaý joldap, muǵalimderge degen zor qurmetin jetkizdi, dep habarlaidy Ult.kz.
Prezidenttiń aitýynsha, muǵalim – ár balanyń ómir jolyn aiqyndap, urpaq tárbiesine ólsheýsiz úles qosatyn tulǵa.
– Mirjaqyp Dýlatuly «Halyqqa eń paidaly adam – muǵalim» degen. Muǵalim – ár azamat úshin óte qadirli tulǵa. Basqa sózben aitqanda, muǵalim – árbir balaǵa ómir jolyn kórsetedi. Ustaz – tálim-tárbie men bilimniń qainar kózi. Kez kelgen qoǵamnyń kemeldigi, órkeniettiligi ustazǵa degen qatynasymen ólshenedi. Ustazyn ulyqtaǵan eldiń urpaǵy sanaly, bolashaǵy jarqyn bolary haq. Sebebi ár muǵalimniń eńbegi – eren, elimizdiń damýyna qosqan úlesi – orasan. Sondyqtan búgin men bilim berý salasynda eńbek etip júrgen barsha azamatqa shynaiy rizashylyǵymdy bildiremin, – dedi Qasym-Jomart Toqaev.
Memleket basshysy ozyq oily ult bolý úshin eń aldymen, bilim-ǵylymnyń damýyna basa mán berýimiz kerek dep sanaidy.
– Sońǵy bes jylda elimizde osy baǵytta kóp jumys isteldi. Bilim salasyna bólinetin qarjy úsh ese artty. 1200 jańa mektep ashyldy. «Keleshek mektepteri» ulttyq jobasy júzege asyrylyp jatyr. Osy joba boiynsha zaman talabyna sai 150 bilim oshaǵy salyndy. Sondai-aq osyndai 67 mekteptiń qurylysy júrip jatyr. Balalardyń sapaly bilim alýyna qajetti barlyq jaǵdai jasalýda. Bul derekti halyq bilýi kerek, sebebi memleket jas urpaqtyń bilimine jáne ustazdardyń jaǵdaiyna basa nazar aýdaryp jatyr. Biz pedagogterdiń mártebesin kóterip, áleýmettik jaǵdaiyn jaqsartý úshin naqty sharalardy qolǵa aldyq. Arnaiy zań qabyldadyq. Búginde ustazdardyń jalaqysy 2 ese ósti, – dedi Prezident.
Qasym-Jomart Toqaev ustaz bolý naǵyz bilikti, daryndy, sheber mamannyń ǵana qolynan keletinin aitty. Prezident muǵalimniń eńbegi soǵan sai laiyqty baǵalanýǵa tiis ekenine toqtaldy.
– Qazir bilim naryǵynda báseke kúsheidi, kóptegen jastarymyz ustaz bolýǵa umtylyp jatyr. Ásirese, mektepti «Altyn belgimen» bitirgen túlekterdiń arasynda muǵalimdik jolyn tańdaǵandar kóp. Bul – óte jaqsy úrdis. Memleket mundai azamattardy árdaiym qoldaidy. Biyl muǵalimder daiarlaý úshin 13 myńnan astam grant bólindi. Bul – elimizdegi barlyq granttyń besten birine jýyǵy degen sóz. Jalpy, bilim berý salasynda júieli jumys istelip jatyr, nátijesi de jaqsy dep aitýǵa bolady. Mysaly, byltyrdan beri myńnan astam oqýshy túrli pánnen halyqaralyq bilim saiysynda jeńimpaz atandy. Bul – ustazdardyń belsendi jumysynyń jemisi, daryndy jastarymyzdyń tabandy eńbeginiń nátijesi. Men tamyz aiynda olimpiada jeńimpazdary men júldegerlerin Aqordaǵa shaqyryp, olarǵa arnaiy sertifikattar tabystadym. Bul dástúr jalǵasyn tabady, – dedi Prezident.
Memleket basshysy el jastaryna zor úmit artyp, óskeleń urpaqtyń erteńine úlken senimmen qaraitynyn jetkizdi.
– Qazirgidei qubylmaly zamanda sapaly bilimmen qatar, sanaly tárbieniń mańyzy erekshe. Biz osy máselege basa nazar aýdarýymyz kerek. Bul iske memleket te, mektep te, otbasy da birdei atsalysýy qajet. Biyldan bastap barlyq mekteptiń oqytý úderisine «Adal azamat» birtutas tárbie baǵdarlamasy engizilip jatyr. Basty maqsat – jas urpaqtyń sanasyna jalpyulttyq qundylyqtardy sińirý, olardy otanshyl rýhta tárbieleý. Qazirgi tańda búkil halyq «Taza Qazaqstan» tujyrymdamasyn iske asyrýǵa qomaqty úles qosyp, osy mańyzdy jumysqa belsendi túrde atsalysýda. «Taza Qazaqstan» jalpyulttyq qozǵalysy – jai naýqan emes, bul – mán-maǵynasy tereń, elimizdiń bolashaǵyna tikelei qatysy bar jumys. Sondyqtan men barlyq muǵalimder qaýymyna osy bastamaǵa qoldaý kórsetkeni úshin alǵys aitamyn. Munyń bári, túptep kelgende, ult sapasynyń myqty bolýyna áser etedi. Jalpy, alda áli de kóp jumys bar. Men Tamyz konferentsiiasynda bilim berý isine qatysty birqatar ózekti máselege arnaiy toqtaldym. Úkimetke naqty tapsyrmalar berdim. Oqý-aǵartý ministrligi barlyq jumysty ýaqtyly ári sapaly oryndaýy kerek, – dedi Qasym-Jomart Toqaev.
Prezident zaman talabyna sai damyǵan, ozyq el bolýǵa úndep, bilim berý isindegi tsifrlandyrý máselesine nazar aýdardy.
– Tsifrlandyrý jáne jasandy intellekt tehnologiiasy – qazirgi zamannyń aqiqaty. Sol sebepti men biylǵy halyqqa Joldaýymdy osy ózekti máselege arnadym. Tsifrlyq saýattylyqty balalarǵa mektepten bastap úiretken durys. Oqýshylar ozyq tehnologiiany oqýda tiimdi paidalana bilgeni jón. Bul – ustazdarǵa da qatysty másele. Muǵalimder zamanaýi daǵdylardy jetik meńgerýi qajet. Jasandy intellektini bilim salasynda keńinen paidalanǵan abzal. Tsifrlyq el bolý – bir kúnniń sharýasy emes. Qarapaiym tilmen aitqanda, bul – mektepten bastap túbegeili jańa tásilmen jumys isteý degen sóz. Sizder, qurmetti ustazdar, osy mańyzdy missiiany júzege asyrýǵa atsalysyp, belsene jumys isteisizder dep senemin, – dedi Memleket basshysy.
Qasym-Jomart Toqaev elimizdiń memlekettik saiasatynda «Zań jáne tártip» qaǵidasy ústemdik quratynyn jetkizip, ony júieli júzege asyrý nátije bere bastaǵanyna toqtaldy.
– 2019 jyldan beri qylmystyq quqyqbuzýshylyqtyń sany eki ese qysqardy. Ýákiletti organdar bul baǵyttaǵy keshendi jumysty jalǵastyrýy kerek. Qoǵamda joǵary quqyqtyq mádeniet qalyptastyrýda Oqý-aǵartý ministrligi men pedagogter airyqsha ról atqarady. Sebebi ádildik, zań jáne tártip qaǵidattary mektep partasynan bastap ornyǵýy qajet. Osylai ǵana biz óskeleń urpaqtyń úilesimdi damýyn qamtamasyz etip, shyn máninde Qaýipsiz, Qýatty jáne Ádiletti Qazaqstandy qura alamyz, – dedi Prezident.
