Qyrǵyzstandyq eki stýdenttiń tikelei efirde Kenesary hanǵa qatysty aitqan sózi áleýmettik jelide narazylyq týǵyzdy. Keiin olar qazaq halqynan keshirim surady, dep habarlaidy ult.kz.

Stýdentter ózge halyqtyń namysyna tietin sóz aitýǵa bolmaitynyn moiyndap, qazaq halqyn kemsitýdi maqsat etpegenderin jetkizdi.

«Biz sizderden shyn júrekten keshirim suraimyz. Qandai jaǵdai bolmasyn, ózge halyqtyń namysyna tietin sóz aitýǵa bolmaidy. Biz eshqashan qazaq halqyn kemsitýge nemese qaralaýǵa maqsat qoiǵan joqpyz», - dedi olar.

Zańger Meiirman Shekeevtiń málimetinshe, eki qyzǵa qatysty qylmystyq is qozǵalyp, sotqa deiingi tergep-tekserý bastalǵan. Protsestik sheshim Qazaqstan zańnamasyna sáikes qabyldanatyny aityldy.

Ázirge istiń qai bap boiynsha qozǵalǵany jáne stýdentterge qandai jaza taǵaiyndalýy múmkin ekeni týraly naqty málimet keltirilmegen.

Aita keteiik, qyrǵyzstandyq qyzdar daýly sózderi úshin keshirim surady. 

Ne jaǵdai boldy?

Áleýmettik jelidegi tikelei efir kezinde qyrǵyzstandyq eki stýdent Kenesary hanǵa qatysty «Kenesarynyń basynan sharap ishemiz» degen sóz aitqan. Bul úzindi jelide tarap, qazaqstandyqtardyń narazylyǵyn týǵyzdy.

Jeli qoldanýshylary stýdentterdiń sózin qazaq halqynyń tarihi tulǵasyna qurmetsizdik dep baǵalady. Qoǵamdyq talqylaýdan keiin eki qyz keshirim surap, ózge halyqtyń namysyna tietin sóz aitýǵa bolmaitynyn moiyndady.

Kenesary han kim?

Kenesary Qasymuly (1802–1847) — Qazaq handyǵynyń sońǵy hany, Abylai hannyń nemeresi. Ol 1837–1847 jyldary Resei imperiiasynyń otarlaý saiasatyna qarsy ult-azattyq qozǵalysty basqardy.

1841 jyly han sailanǵan Kenesary qazaq jeriniń tutastyǵyn saqtap, eldiń derbestigin qalpyna keltirýge umtyldy. Úsh júzdiń basyn biriktirýge kúsh saldy.

Kenesary han 1847 jyly qyrǵyz jerindegi shaiqasta qaza tapty. Ol Qazaqstan tarihynda el táýelsizdigi úshin kúresken tulǵa retinde qurmetteledi.