Belgili ánshi Qaraqat Ábildina men jubaiy Qydyráli Bolmanov qazaq kinosynyń ańyzyna ainalǵan aktrisa Merýert Ótekeshovany úilerine qonaqqa shaqyryp, syi-qurmet kórsetti. Ánshi bul kezdesýden alǵan áserin áleýmettik jelidegi paraqshasynda bólisti, dep habarlaidy ult.kz.
Qaraqat Ábildinanyń aitýynsha, ol Merýert Ótekeshovany buǵan deiin de birneshe ret qonaqqa shaqyrǵan. Alaida túrli sebeptermen kezdesý keiinge qalyp kelgen. Aqyry óner ieleri bir dastarhan basynda bas qosyp, emen-jarqyn áńgimelesýdiń sáti túsken.
Ánshi qazaq kino ónerinde óshpes iz qaldyrǵan aktrisany shańyraǵynda qarsy alý ózi úshin úlken mártebe ekenin jetkizdi. Ol Merýert Ótekeshovanyń ónerdegi ornyna erekshe toqtalyp, halyqtyń júreginen oryn alǵan tulǵaǵa degen yqylasyn bildirdi.
"Bir dáýirdiń sulýlyq simvolyna, tutas ulttyń júregindegi Qyz Jibek beinesine ainalǵan aiaýly Merýert Ótekeshova apamyzdy osyǵan deiin aq dastarhanymyzǵa talai márte shaqyrǵan edik. Kóńil qalaǵanmen, ár kezdesýdiń Alla násip etken óz sáti bolady eken. Ónerimen ult jadynda, ónegesimen el júreginde qalǵan asyl apamyzdy tórimizden kórý – biz úshin úlken qýanysh!" – dep jazdy Qaraqat Ábildina.
Bul basqosýǵa aktrisadan bólek, elge belgili azamattardyń otbasy músheleri de qatysqan. Olardyń qatarynda memleket jáne qoǵam qairatkerleri Berdibek Saparbaev pen Maqsut Nárikbaevtyń jubailary bolǵan. Sondai-aq Qyzylordanyń qurmetti azamaty, qurylys salasynyń ókili Májit esimdi azamat ta jubaiymen birge qonaqqa kelgen.
Qaraqat Ábildina kezdesýdiń eń qundy tusy úlkenderdiń ómirlik tájiribesi men ónegeli áńgimelerin tyńdaý bolǵanyn atap ótti. Ásirese elge qyzmet etken azamattardyń janynda júrip, otbasynyń berekesin saqtaǵan analardyń ómir joly kópshilikke úlgi ekenin aitty.
"Ómirdiń ystyǵy men sýyǵyn birge ótkerip, azamattaryna súieý, shańyraǵyna tireý bolǵan analarymyzdyń árqaisysynyń ǵumyry – ónege, aitar áńgimesi – tunyp turǵan taǵylym. Men úshin úlkendermen syrlasýdyń, ómirden túigenin tyńdap, aqylyn alýdyń orny bólek", – dedi ánshi.
Óz kezeginde Merýert Ótekeshova da dastarhan basynda aq tilegin arnap, Qaraqat Ábildina men Qydyráli Bolmanovtyń otbasyna rizashylyǵyn bildirgen.
Áleýmettik jeli qoldanýshylary ónerli otbasynyń qonaqjailyǵyna súisinip, úlkenge qurmet kórsetýdiń osyndai úlgileri kóp bolýy kerektigin jazdy. Kópshilik ásirese Merýert Ótekeshovaǵa kórsetilgen iltipatty jyly qabyldaǵan.
Qaraqat Ábildina kim?
Qaraqat Ábildina – qazaqstandyq tanymal ánshi, dástúrli jáne estradalyq ánderdi oryndaýshy, mádeniet qairatkeri. Ol qazaqtyń ulttyq ónerin nasihattap, halyq ánderin zamanaýi sahnada oryndaýymen keńinen tanylǵan. Óner iesi uzaq jyldar boiy qazaq mýzykasynyń damýyna úles qosyp keledi. Qaraqat Ábildina halyq ánderimen qatar avtorlyq shyǵarmalardy da oryndaidy. Onyń repertýarynda ulttyq qundylyqtardy, anaǵa degen qurmetti, otbasy men mahabbatty dáripteitin ánder bar. Ánshi belgili prodiýser ári óner qairatkeri Qydyráli Bolmanovpen otbasyn qurǵan. Erli-zaiyptylar Qazaqstannyń mádeni ómirine belsendi aralasyp, túrli shyǵarmashylyq jobalardy júzege asyryp keledi.
Qaraqat Ábildina 1978 jyly 6 sáýirde Qaraǵandy oblysynyń Jańaarqa aýdanyndaǵy Baiǵul aýylynda dúniege kelgen. Ol Qurmanǵazy atyndaǵy Almaty memlekettik konservatoriiasynda bilim alyp, dombyramen halyq ánderin oryndaý mamandyǵyn meńgergen. Ánshilik sheberligin belgili ustaz Sáýle Janpeiisovadan úirengen. Keiin Qazaqstannyń halyq ártisi Qairat Baibosynovtyń jetekshiligimen aspirantýrada bilimin jetildirip, ony 2004 jyly aiaqtaǵan.
Shyǵarmashylyq jolynda 1998-2003 jyldary "Saltanat" án-bi ansamblinde eńbek etken. 2003 jyldan bastap "Gúlder" memlekettik ansambliniń ánshisi bolǵan. 2001 jyly halyqaralyq "Shabyt" baiqaýynyń diplomanty atanǵan. Qaraqat Ábildinaǵa Qazaqstannyń eńbek sińirgen qairatkeri ataǵy berilgen
Óner iesi balalarǵa ulttyq mýzyka men dástúrli án ónerin úiretý maqsatynda "Qaraqat" mektep-stýdiiasyn ashqan. Búginde bul bastama elimizdiń birneshe óńirinde damyp, jas talanttardy tárbieleýge baǵyttalǵan.
