«Alem credit» internet-platformasynyń zańsyz qyzmetine qatysty tergeý júrip jatyr. Quqyq qorǵaý organdary onyń uiymdastyrýshylaryn, zardap shekken azamattardy jáne paidalanylǵan tólem quraldaryn anyqtaýda, dep habarlaidy ult.kz.
Bul týraly Bas prokýror Berik Asylov Quryltai depýtattarynyń saýalyna bergen jaýabynda málimdedi.
Onyń aitýynsha, 2026 jylǵy 13 tamyzda Almaty qalasy boiynsha ekonomikalyq tergep-tekserý departamenti «Alem credit» platformasynyń zańsyz qyzmetine qatysty sotqa deiingi tergeýdi bastaǵan.
Platforma tsifrlyq aktivtermen qaryz berýshi retinde kórsetilgenimen, is júzinde azamattarǵa ulttyq valiýtada aqshany jedel, aqyly jáne qaitarymdy sharttarmen bergen.
Tergeý barysynda segiz zańdy tulǵa men jeti jeke tulǵanyń shottary paidalanylǵany anyqtalǵan. Tintý júrgizilip, baqylaýdaǵy uiymdardyń ieleri, býhgalterleri men IT-mamandary jaýapqa tartylǵan. Al 18 tamyzda platformaǵa bailanysty internet-resýrstarǵa qoljetimdilik shektelgen.
— Qazirgi ýaqytta zańsyz qyzmetti uiymdastyrýshylar, jábirlenýshiler jáne paidalanylǵan tólem quraldary anyqtalyp jatyr. Tergeý barysy Almaty qalasynyń prokýratýrasynyń baqylaýynda, — dedi Berik Asylov.
Bas prokýrordyń málimetinshe, jyl basynan beri quqyq qorǵaý organdary zańsyz mikroqarjy qyzmetine qatysty 19 qylmystyq isti tergegen. Onyń 10-y sotqa joldansa, tórteýi raqymshylyqqa bailanysty toqtatylǵan.
Eske salaiyq, buǵan deiin Quryltai depýtaty Iýrii Li qaryzǵa bergen aqshasyn 23 ese artyq qaitarýdy talap etetin kreditorlardy jaýapqa tartýdy usynǵan bolatyn.
