Qazaqstan Prezidenti Qasym-Jomart Toqaev Alash qairatkerleriniń eńbekteri jan-jaqty zerttelýi kerektigin aitty, dep habarlaidy "Ult aqparat".
Aita keteiik, búgin Prezident Álihan Bókeihan, Ahmet Baitursynuly jáne Mirjaqyp Dýlatuly syndy ultymyzdyń uly tulǵalaryna arnalǵan eskertkishtiń saltanatty ashylý rásimine qatysty.
Prezident jiyn barysynda Alash qairatkerleriniń eńbekteri Alashtaný ǵylymynyń aiasynda jan-jaqty zerttelý qajettigine nazar aýdardy.
«Alashtaný ǵylymy arystarymyzdyń eńbekterin barynsha qamtýy kerek. Jyl ótken saiyn Alashtyń abyroiy asqaqtap, bedeli biiktei beredi. Olardyń atqarǵan isi eshqashan mańyzyn joǵaltpaidy. Sebebi, ult múddesi, el qamy degen uǵymdar – máńgi qundylyqtar», – dedi Qasym-Jomart Toqaev.
Jiyn sońynda Memleket basshysy Alash qairatkerleriniń derbes memleket bolyp, jer júzimen terezesi teń qatynas ornatý jónindegi arman-maqsaty júzege asqanyn atap ótip, elimiz búginde álem qaýymdastyǵynyń beldi múshesine ainalǵanyn aitty.
