Foto: Aqorda
Digital Bridge 2025 halyqaralyq forýmy aiasynda AI SANA Generative Nation baiqaýynyń júldegerleri men jeńimpazdaryn marapattaý rásimi ótti, dep habarlaidy Ult.kz.
Aita ketý kerek, baiqaýǵa elimizdiń túkpir-túkpirinen 335 ótinim túsip, irikteý qorytyndysy boiynsha Schoolers, Students, Startups jáne Science sanattarynan 20 komanda finalǵa joldama aldy.
Qatysýshylar meditsina, bilim berý, ekologiia, ónerkásip jáne sport salalaryna arnalǵan jobalaryn usyndy. Olardyń qatarynda qaterli isikti erte anyqtaý tehnologiialary, psihikalyq densaýlyqty qoldaý platformalary, sý resýrstaryn baqylaý júieleri, emtihannyń ádil ótýin qamtamasyz etetin quraldar jáne tsifrlyq inkliýziia servisteri boldy.
Baiqaý qorytyndysy boiynsha:
Best School AI Project: Úmit – qimyl-qozǵalysy shekteýli adamdarǵa arnalǵan interaktivti qurylǵy. Ol bas pen til qimyly arqyly tsifrlyq qurylǵylar men múgedekter arbasyn basqarýǵa múmkindik beredi.
Best Student AI Project: Beelieve – aralardyń joiylyp ketýiniń aldyn alyp, aýyl sharýashylyǵy daqyldarynyń ónimdiligin arttyratyn smart-omarta júiesi.
Best Startup AI Project: TrustExam – emtihandar men sertifikattaý júiesiniń ádildigin qamtamasyz etip, onlain-monitoring arqyly buzýshylyqtardyń aldyn alatyn AI-platforma.
Best Science AI Project: Mirai Tech – sport, meditsina jáne bilim salalaryn toǵystyryp, ózdiginen generatsiialanatyn sensorlar negizinde qimyldy taldaityn AI-platforma jeńimpaz atandy.
Foto: JI ministrligi
Qazylar alqasy memleket, ǵylym jáne biznes ókilderinen jasaqtaldy. Onyń quramyna QR Parlamenti Májilisiniń depýtaty Ekaterina Smyshliaeva, Astana qalasy Tsifrlandyrý jáne memlekettik qyzmetter basqarmasynyń basshysy Berik Ahmetov, Booking.com kompaniiasynyń tehnologiialyq jetekshisi Álibek Datbaev, TengizChevroil kompaniiasynyń tsifrlyq sheshimder arhitektory Gúlmira Sharbakova, InDrive.kz óńirlik biznes-menedjeri Arai Bekembaev, Blockchain & AI Technology Center bas direktory Aidana Qasqyrbek jáne Alem.ai Foundation bas direktory Adina Magavina kirdi.
Jeńimpazdarǵa jan-jaqty qoldaý kórsetildi. Mektep oqýshylarynyń komandasyna noýtbýkter tabystalyp, TUMO baǵdarlamasy men Astana Hub kýrstaryna qatysý múmkindigi berildi. Stýdentter 5 mln teńge syiaqy jáne Astana Hub bilim berý kýrstaryna sertifikat aldy. Úzdik startap 7 mln teńge utyp, Digital Bridge 2025 forýmyndaǵy Startup Alley alańynda óz jobasyn tanystyrmaq. Al ǵylym sanatyndaǵy top 10 mln teńge men Startup Alley-de óz ázirlemelerin kórsetý quqyǵyna ie boldy. Barlyq jeńimpaz komandalar alty ai boiy Astana Hub kovorkingin paidalana alady. Ár finalistke qatysýshy sertifikaty men estelik syilyq tabystaldy.
Budan bólek, jeńimpaz komandalar jetekshi sarapshylardan mentorlyq qoldaý alady. Olardyń qatarynda QR Premer-ministriniń orynbasary – jasandy intellekt jáne tsifrlyq damý ministri Jaslan Mádiev, QR Ǵylym jáne joǵary bilim ministri Saiasat Nurbek, Astana Hub bas direktory Maǵjan Madiev, «Qazaqtelekom» AQ basqarma tóraǵasy Baǵdat Mýsin, Silkroad Innovation Hub bas direktory Áset Abdýaliev jáne MA7 Venture negizin qalaýshy Murat Abdrahmanov bar.
