Foto: ashyq derekkóz
Memleket basshysy Qasym-Jomart Toqaev Ǵylym jáne tehnologiialar jónindegi ulttyq keńestiń otyrysynda sóz sóilep, eldiń ǵylymi-innovatsiialyq áleýetin arttyrýǵa baǵyttalǵan birqatar bastamalardy jariialady, dep habarlaidy Ult.kz.
Prezidenttiń aitýynsha, qazir jer qoinaýyn igerýshi kompaniialar tabysynyń bir paiyzyn ǵylymdy damytýǵa bólip otyr. Bul qarajat salyq retinde emes, elimizdiń tehnologiialyq áleýetin kóterýge qosylǵan úles retinde qarastyrylýy tiis.
– Úkimet osy qarajattyń bir ortalyqtan únemdi, tiimdi ári ashyq jumsalýyn qamtamasyz etýi kerek. Atom salasyn zertteitin ǵylymi qalashyqtar qurýǵa erekshe nazar aýdarý qajet. Almatydaǵy Iadrolyq fizika institýtynyń bazasynda kóp maqsatty zertteý reaktoryn salý múmkindigin qarastyrǵan jón. Jalpy, institýttyń áleýeti joǵary. Elimizdiń jańa ǵylymi qalashyǵyn osy mekemeniń negizinde qurýǵa bolady, – dedi Qasym-Jomart Toqaev.
Memleket basshysy Abai oblysynda AES salý perspektivalaryna bailanysty Kýrchatovtaǵy ǵylymi qalashyqtyń egjei-tegjeili josparyn ázirleýdi tapsyrdy. Bul iske Ǵylym akademiiasy, oblys ákimdigi jáne Ulttyq iadrolyq ortalyq qatysýy qajet.
Sonymen qatar iadrolyq infraqurylymdy nyǵaitý úshin memleket-jekemenshik seriktestiginiń tiimdi tetikterin ázirleý mindeti qoiyldy.
Prezident óz sózinde iadrolyq meditsinany damytýdyń mańyzdylyǵyna da toqtaldy.
– Ozyq iadrolyq tehnologiialardy qoldaný arqyly ulttyq densaýlyq saqtaý júiesiniń tiimdiligin edáýir arttyrýǵa bolady. Ásirese, onkologiialyq jáne júrek-qan tamyrlary aýrýlaryn emdeýde jańa múmkindikter ashylady. Úkimettiń mindeti – otandyq radiofarmatsevtikalyq preparattardy ázirleý jáne olardy qoldanysqa engizý. Sondai-aq jetekshi klinikalar men ýniversitetter janynan iadrolyq meditsina ortalyqtarynyń jelisin qurý qajet, – dedi Memleket basshysy.
