2021 jylǵy 1 sáýirge deiin Gazdandyrýdyń bas syzbasynyń ózektendirilgen jobasyn ázirleý qajet. Bul týraly Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Gazdy tutynýdyń boljamdanyp otyrǵan jyl saiynǵy ósýin eskere otyryp, Gazdandyrýdyń bas shemasyn jańartý qajet. Bul oraida demografiialyq faktordy, ónerkásiptiń ósip kele jatqan qajettilikterin, eksporttyq perspektivalardy jáne qoldanystaǵy mindettemelerdi eskerý kerek. Sondai-aq bul investorlar úshin de mańyzdy. Sebebi olar úshin shikizat bazasynyń, ásirese gazdyń jetkilikti bolýy - naryqqa kirýdiń negizgi sharttarynyń biri», - dedi Asqar Mamin.
Osyǵan orai Premer-Ministr elimizdiń Energetika ministrligine múddeli memlekettik organdarmen jáne uiymdarmen birlesip, 2021 jylǵy 1 sáýirge deiingi merzimde Gazdandyrýdyń bas syzbasynyń ózektendirilgen jobasyn ázirleýdi tapsyrdy.
«Soltústik óńirlerdi gazdandyrý maqsatynda 2021 jyldyń 1 naýryzyna deiin «Saryarqa» gaz qubyry jobasynyń 2 jáne 3 kezeńderin iske asyrý boiynsha tehnikalyq-ekonomikalyq negizdemelerdi jańartyp, barlyq saraptamany alýdy tapsyramyn. 2021 jyldyń 1 sáýirine deiin Energetika ministrligi Shyǵys Qazaqstan oblysyn gazdandyrý tujyrymdamasyn daiyndap, qajetti esep men kútiletin áserdi qarastyrsyn», - dedi Úkimet basshysy.
Sonymen qatar Premer-Ministr búgingi kúni óńirlerdegi gazben jabdyqtaý nysandarynyń sany myńnan asatyndyǵyna nazar aýdartty.
«Olar qaita jańǵyrtýdy qajet etedi. Bul rette, qazirgi ýaqytta, osy nysandardy ákimdikterden paidalanýshy uiymdardyń balansyna berý jumystary júrgizilip jatyr. Sonymen birge bul oryn alyp otyrǵan defektilerdi, jóndeýdi jáne qajetti qujattardy qalpyna keltirýge bailanysty qosymsha shyǵynǵa ákelip otyr. Osyǵan orai Túrkistan, Aqtóbe, Jambyl, Mańǵystaý, Batys Qazaqstan, Almaty oblystarynyń jáne Almaty qalasynyń ákimdikteri jergilikti biýdjetten qajetti qarajatty qarastyrsyn», - dedi Asqar Mamin.
