Premer-Ministrdiń tóraǵalyǵymen Daǵdarysqa qarsy sharalar jónindegi jedel shtab otyrysy ótti, dep habarlaidy "Ult aqparat" primeminister.kz-ke silteme jasap.
Daǵdarysqa qarsy sharalar jónindegi jedel shtab otyrysynda «Atameken» Ulttyq kásipkerler palatasy kásipkerlerden kelip túsip jatqan basym bóligi aǵymdaǵy jáne júieli sipattaǵy máseleler týraly baiandady.
Aita keteiik, ótken jyldyń qorytyndysy boiynsha Úkimette osy turǵyda 160-tan astam problemalyq máseleler qaraldy, olardyń 75% oń sheshimin tapty. Bul baǵyttaǵy jumys jalǵasýda, kásipkerlerge qabyldanyp jatqan sheshimder jaily turaqty túrde habarlanyp otyrady.
Biznes qoǵamdastyqtyń qazaqstandyq júkterdiń tasymaldanýyna qatysty alańdaýshylyǵyna bailanysty «Qazaqstan Temir Joly» UK» AQ basqarma tóraǵasy N. Saýranbaev eksporttyq baǵyttaǵy júkterdi tasymaldaý temir jol kóligimen de, teńiz porttary arqyly da shtattyq rejimde júzege asyrylyp jatqanyn habarlady.
Sondai-aq, N. Saýranbaev QHR-ǵa jáne keri baǵytta temir jol kóligimen júk tasymaldaý boiynsha eshqandai kedergilerdiń joq ekenin jetkizdi.
Eýropa elderine úzdiksiz júk tasymalyn qamtamasyz etý maqsatynda Transkaspii halyqaralyq kólik baǵyty arqyly Ázerbaijan jáne Grýziia (Baký, Batými jáne Poti porttary) baǵytynda tasymaldaý kólemin ulǵaitý máselesi pysyqtalýda.
Óz kezeginde, QR indýstriia jáne infraqurylymdyq damý ministri Q. Óskenbaev Aqtaý jáne Quryq porttaryn paidalanýdyń áleýeti zor ekenin atap ótti, sebebi olardyń qazirgi júktemesi nebary 23% ǵana qurap otyr jáne jetkilikti rezerv bar.
Sondai-aq, Riga, Ventspils, Liepaia Baltyq porttary arqyly ótetin qosymsha baǵyttar pysyqtalýda.
Konteinerlik tasymal kólemin arttyrý úshin otandyq konteinerler óndirisin ashý boiynsha jumys júrgizilip jatqanyn atap ótken jón. 2022-2023 jyldary 2 mln tonna júkti konteinerleý jáne konteinerlik tasymaldar úlesin 30%-ǵa deiin (eksport) kóbeitý josparlanǵan.
Qarjy júiesiniń turaqtylyǵyn qamtamasyz etý boiynsha qabyldanyp jatqan sharalar týraly Qazaqstan Respýblikasy Qarjy naryǵyn retteý jáne damytý agenttiginiń basshysy M. Ábilqasymova, Ulttyq Bank tóraǵasynyń orynbasary A. Baimaǵambetov jáne «Qazaqstan Halyq banki» AQ basqarma tóraǵasy Ú. Shaiahmetova baiandady.
