Jańa jasaqtalǵan Úkimet áleýmettik-ekonomikalyq damýdyń negizgi baǵyttaryna basa nazar aýdarý kerek. Bul týraly QR Premer-Ministr Asqar Mamin aitty, dep habarlaidy QazAqparat.
«Búgin jańartylǵan Úkimettiń alǵashqy otyrysy. Parlament árbir Úkimet múshesin maquldady. Memleket basshysy Qasym-Jomart Toqaev tiisti Jarlyqtarǵa qol qoidy. Bul - Elbasy Nursultan Nazarbaevtyń, Memleket basshysy jáne Parlamenttiń joǵary senim bildirýi. Biz ony úlken jaýapkershilikpen aqtap, «Nur Otan» partiiasynyń «Ózgerister joly. Ár azamatqa laiyqty ómir» atty sailaýaldy baǵdarlamasyn jáne bizdiń aldymyzǵa qoiǵan barlyq mindetterdi sapaly oryndaýymyz kerek», - dedi Úkimet otyrysyn ashqan Asqar Mamin.
Premer-Ministr ekonomikany qarqyndy damytý arqyly halyqtyń ómir súrý sapasyn, ál-aýqatyn jaqsartýǵa jáne tabysyn arttyrýǵa, sonymen qatar jańa jumys oryndaryn qurýǵa jaǵdai jasalatyndyǵyn basa aitty.
«Sonymen birge áleýmettik-ekonomikalyq damýdyń negizgi baǵyttaryna basa nazar aýdarý kerek. Ekonomikanyń básekege qabilettiligin arttyrýǵa, investitsiialar tartýǵa, jańa tehnologiialar jáne eksportty damytýǵa baǵyttalǵan naqty sharalardy júzege asyrý qajet. Osyǵan orai elimizdiń odan ary áleýmettik-ekonomikalyq damý jolynda barlyq kúsh-jigerimizdi salyp, naqty nátijeli, sapaly ári tiimdi jumys atqarýymyz kerek», - dedi Úkimet basshysy.
