Qazaqstan Respýblikasynyń Premer-ministri Oljas Bektenov Memleket basshysynyń atynan qazaqtyń tuńǵysh ǵaryshkeri, Halyq qaharmany, aviatsiia general-maiory Toqtar Áýbákirovti 80 jyldyq mereitoiymen quttyqtady, dep habarlaidy ult.kz.
«Halqymyz ózińizdi áigili ǵaryshker, kórnekti qoǵam qairatkeri, otansúigish azamat retinde airyqsha qadirleidi. Sizdiń eńbek jolyńyz jarqyn belesterden turady. Biraz jyl kásibi ushqysh bolyp, jańa áskeri ushaqtardy synaqtan ótkizip, eren erliktiń úlgisin kórsete bildińiz. Siz zeńgir kókke kóterilgen qazaqtyń tuńǵysh ǵaryshkeri atandyńyz. Elimizdiń álem aldyndaǵy mártebesin arttyrýǵa, halyqaralyq yntymaqtastyqty nyǵaitýǵa, ulttyq aeroǵarysh, qorǵanys ónerkásibi salalarynyń damytýyna qosqan úlesińiz óte mol. Parlament Májilisiniń depýtaty bolǵan kezińde tereń bilimińiz ben ómirlik tájiribeńizdi otandyq zańnamany jetildirý isine arnadyńyz. Aldaǵy kezeńde eseli eńbegińizdiń jemisin kórip, el-jurttyń syi-qurmetine bólene berýińizge tilektestigimdi bildiremin. Sizge myqty densaýlyq, uzaq ǵumyr, otbasyńyzǵa baq-bereke tileimin», — delingen Prezident Qasym-Jomart Toqaevtyń quttyqtaý hatynda.
Premer-ministr 1 shildede Qazaqstan Respýblikasynyń jańa Konstitýtsiiasy kúshine engenin atap ótti. Atalǵan qujat Ádiletti memleket qurý tujyrymdamasyn bekitip, elimizdiń odan ári damý baǵdaryn aiqyndaidy.
«Búginde Prezidentimizdiń «Ádiletti Qazaqstan» bastamasyna árdaiym qoldaý bildirip, jańa Konstitýtsiiada aiqyndalǵan ulttyń jańa sapasyn qalyptastyrý isine de aianbai atsalysyp júrsiz. Óitkeni, otanshyldyq, ádildik, zań men tártip, erlik pen eńbekqorlyq siiaqty asyl qasietterdi jastardyń boiyna sińirýde Alash jurtynyń adal perzenti, halqymyzdyń has batyry retinde Sizdiń alatyn ornyńyz erekshe», — dep atap ótti Oljas Bektenov.
Saltanatty is-sharaǵa aeroǵarysh salasynyń, Qarýly kúshter men Generaldar keńesiniń ókilderi, sondai-aq otandyq jáne sheteldik ǵaryshker-ushqyshtar, synaqshy-ushqyshtar, injenerler men konstrýktorlar qatysty.
Jiynǵa qatysýshylar aldynda sóz sóilegen Premer-ministr ǵarysh salasynyń Qazaqstannyń tehnologiialyq damýyna qosyp otyrǵan mańyzdy úlesin atap ótti. Elimizde ulttyq spýtniktik bailanys jáne Jerdi qashyqtan zondtaý júieleri jumys isteidi, aýyl sharýashylyǵy, ekologiia jáne ózge de salalardyń qajettiligi úshin derekterdi óńdeý júiesi jetildirilýde, sonymen qatar derekterdi óńdeý múmkindikteri keńeitilip, shalǵaidaǵy eldi mekenderdiń internetke qoljetimdiligi artyp keledi. Sondai-aq Baiqońyr ǵarysh ailaǵynan «Suńqar» zymyran-tasyǵyshynyń sátti synaqtyq ushyrylýy otandyq ǵarysh salasynyń damýyndaǵy jańa kezeńniń bastalýyna jol ashqany erekshe atap ótildi.
