QR Premer-Ministri Álihan Smaiylov jol qurylysy jumystaryn úzdiksiz júrgizýdi jáne josparlanǵan aýmaqta aqyly júieni tolyq engizýdi tapsyrdy, dep habarlaidy QazAqparat.
«Indýstriia ministrligi ákimdiktermen, QazAvtoJolmen birlesip, josparlanǵan jobalardy ýaqytynda paidalanýǵa berýdi jáne bólingen qarajatty tolyq igerýdi qamtamasyz etýi qajet. Qurylys maýsymyn barynsha tiimdi paidalaný óte mańyzdy. Ekinshiden, qurylys jumystaryn úzilissiz júrgizý úshin Energetika ministrligi men «Qazaqstan Temir Joly» qurylys kompaniialaryn qajetti mólsherde bitýmmen jáne inertti materialdardy jetkizý úshin temirjol vagondarymen qamtamasyz etýi kerek», - dep atap ótti Smaiylov Úkimet otyrysynda.
Sonymen birge, Indýstriia ministrligi jyl sońyna deiin avtojoldardyń josparlanǵan ýchaskelerinde aqy tóleýdi engizip, ózin-ózi qamtamasyz etýge kóshirý jumysyn aiaqtaýy qajet. Bul avtojoldardy normativtik jaǵdaida kútip-ustaýǵa múmkindik beredi.
«Jol boiyndaǵy qyzmet kórsetý nysandaryn jańǵyrtý jumystaryn sapaly júrgizip, 2026 jylǵa qarai olardyń barlyǵyn Ulttyq standartqa sáikestendirý kerek. Sondyqtan ákimdikter QazAvtoJolmen birlesip, qyzmet kórsetý nysandaryn salý úshin avtojoldar boiynan jer berip, osy baǵytty damytýdy jandandyrsyn. Ulttyq ekonomika ministrligi Qarjy jáne Indýstriia ministrlikterimen birlesip, bekitilgen jobalyq-smetalyq qunynan asatyn jobalardy qosymsha qarjylandyrý tetigin ázirleýi kerek», - dep tapsyrma berdi Úkimet basshysy.
Buǵan deiin Smailov 2022 jyly respýblikalyq mańyzy bar joldardyń 91% jáne jergilikti joldardyń 85%-y qalypty kúide bolatynyn aitqan edi.
