Keshe Úkimet úiinde QR Premer-Ministri Álihan Smaiylovtyń tóraǵalyǵymen Daǵdarysqa qarsy sharalar jónindegi jedel shtabtyń kezekti otyrysy ótti. Otyrysta dári-dármekpen qamtamasyz etý jáne kólik máseleleri qaraldy.
Úkimettiń Telegram paraqshasynda habarlanǵandai, Densaýlyq saqtaý ministri Ajar Ǵiniiat dári-dármekpen qamtamasyz etý týraly aqparat berdi.
«Qazir respýblikanyń 8 óńirinde - Almaty qalasy, Shyǵys Qazaqstan, Soltústik Qazaqstan, Almaty, Pavlodar, Qostanai, Aqmola, Túrkistan oblystarynda 5 mlrd teńgeden astam somaǵa dárilik zattardy turaqtandyrý qorlary jumys isteidi», — dedi Ǵiniiat.
Qalǵan 9 óńir boiynsha iri kóterme dárihana qoimalarynda dárilik zattar qory jasalǵan.
Vedomstvo basshysy dári-dármekpen qamtamasyz etý máseleleri erekshe baqylaýda ekenin habarlady.
Qazaqstandyq delegatsiianyń Ázerbaijan men Grýziiaǵa saparynyń qorytyndysy boiynsha birlesken qujatqa qol qoiyldy.
QR indýstriia jáne infraqurylymdyq damý vitse-ministri B. Qamaliev qujattyń negizgi maqsaty Transkaspii halyqaralyq kólik baǵyty boiynsha tyǵyz yntymaqtastyqty damytý jáne biryńǵai logistikalyq kompaniia qurý ekenin atap ótti.
Sondai-aq Qazaqstan, Ázerbaijan jáne Grýziia arasyndaǵy bul bastamaǵa Túrkiia Respýblikasy qosylýǵa nietti.
Atalǵan baǵyt boiynsha júk tasymaldaý týraly «Qazaqstan Temir Joly» AQ UK basqarma tóraǵasy N. Saýranbaev baiandady.
Ol búgingi tańda júkterdiń negizgi nomenklatýralary (kómir, koks, ferroqorytpalar jáne t.b.) boiynsha vagondar men konteinerler arqyly tasymaldaýǵa arnalǵan keshendi tarif mólsherlemesi bekitilgenin atap ótti.
Sonymen qatar N. Saýranbaev buǵan deiin «Atameken» UKP málimdegendei, Qytai tarapynyń temirjol tasymaly tarifterin edáýir ósirgenine qatysty aqparattyń rastalmaǵanyn habarlady.
Búginge deiin kúndelikti ótkizilip kelgen Jedel shtab otyrystaryn endi biznes-qaýymdastyqtyń ótinishi boiynsha olardyń suraqtarynyń kelip túsýine qarai aptasyna eki ret ótkizýge sheshim qabyldandy.
Jedel shtabtyń kelesi otyrysy 17 naýryzda ótedi.
