QR Premer-Ministri Álihan Smaiylov «Shevron» (Chevron) kompaniiasynyń óndirý máseleleri jónindegi vitse-prezidenti Djeims Djonsonmen kelissóz júrgizdi. Bul týraly Úkimettiń saity habarlady.
Kezdesýde «Teńizshevroil» (TShO) Bolashaqta keńeitý jobasyn jáne Saǵalyq qysymdy basqarý jobasyn iske asyrý, Qarashyǵanaq jobasyn keńeitý jáne Kaspii qubyr konsortsiýmynyń qýatyn arttyrý perspektivasy talqylandy.
«Barlyq iske asyrylyp jatqan jobalardy ýaqytyly iske qosýdy qamtamasyz etý qajet. Jumyskerlerdi josparly túrde bosatýǵa jáne jumyspen qamtýǵa sapaly monitoring júrgizýdiń mańyzy zor», — dedi Á. Smaiylov.
Premer-Ministr QR Úkimeti Teńiz ken ornyn damytýǵa erekshe nazar aýdaratynyn jáne «Shevron» kompaniiasymen uzaq merzimdi yntymaqtastyqty ári qarai damytýǵa nietti ekenin atap ótti.
D. Djonson QR Úkimetine qolaily investitsiialyq ahýaldy jáne munai-gaz salasyndaǵy jobalardy iske asyrý kezinde týyndaityn máselelerdi sheshýdi qamtamasyz etkeni úshin alǵys aitty.
«Shevron» – Qazaqstandaǵy Teńiz (50%), Qarashyǵanaq (18%) jáne Kaspii qubyr konsortsiýmy (15%) úsh iri jobada aktivteri bar iri sheteldik investor. 2021 jyly TShO-da shiki munai óndirý kólemi 26,55 mln tonnany qurady. Biyl 28,73 mln tonna kóleminde munai óndirý josparlanýda.
2023 jyldyń sońynda Bolashaqta keńeitý jobasyn aiaqtaý ken óndirý kólemin jylyna 12 mln tonnaǵa ulǵaitýǵa múmkindik beredi. TShO shikizatymen Atyraý oblysynda polipropilen (qýaty – jylyna 500 myń tonna) jáne polietilen (qýaty – jylyna 1,25 mln tonna) óndirisi boiynsha eki iri gaz-himiia jobasyn qamtamasyz etý máselesi pysyqtalýda.
2021 jyly qazan aiynda QR Energetika ministrligi men «Shevron» kompaniiasy arasynda Qazaqstanda kólemi $248,5 mln quraityn Tikelei investitsiialar qoryn qurý boiynsha ózara túsinistik týraly memorandýmǵa qol qoiyldy. Qor kapitaldandyrýyn «Shevron»-ǵa QR-da túsken paidanyń bir bóligi quraidy.
Qor qarajaty Qazaqstannyń munai-gaz salasynda, qorshaǵan ortany qorǵaýda, sondai-aq aqparattyq jáne tsifrlyq tehnologiialar salasynda taýarlar óndirý, jumystardy oryndaý jáne qyzmetter kórsetý kommertsiialyq kásiporyndaryna investitsiialaý arqyly ekonomikany jáne jergilikti qamtýdy damytýǵa baǵyttalatyn bolady.
