QR Premer-Ministri Álihan Smaiylov eldegi áleýmettik mańyzy bar taýarlardyń baǵasyn retteýge qatysty memlekettik saiasatty túsindirip berdi, dep habarlaidy QazAqparat.
Elordada ótip jatqan «Atameken» ulttyq kásipkerler palatasynyń kezekten tys IH sezinde halyq jii tutynatyn taýarlardyń baǵasyn retteý, turaqtandyrý máselesi kóterildi.
«Ulttyq palata men biznes halyqtyń áleýmettik osal toptaryna kómek kórsetý kerektigimen kelisedi. Biraq, azyq-túliktiń baǵasyn ákimshilik jolmen ustaý, máseleni sheshýdiń oń joly emes. Iaǵni baǵany retteýde ony arzandata túsý qymbatshylyq problemasyn sheshpeidi», - dedi «Atameken» UKP-nyń basqarma múshesi Erbol Óstemirov sezde sóilegen sózinde.
Onyń aitýynsha, mundai jaǵdaida kásipkerge baǵany túsirýden góri, taýardy óndirýden bas tartý ońaiǵa túsedi.
«Biznes qaýymdastyq áleýmettik mańyzy bar taýarlardyń baǵasyn tikelei retteýden bas tartýdy suraidy. Bólshek saýdadaǵy baǵa naryq retteýi tiis», - deidi ol.
Atalǵan máselege qatysty Úkimet basshysy Álihan Smaiylov pikir bildirdi.
«Men kelisemin, baǵany tikelei Úkimet rettemeýi kerek. Bizde ótken jyly qabyldanǵan zań bar. Oǵan sáikes Úkimet saýda marjasynyń tek 15%-ǵa baqylaý júrgize alady. Biz tek sol zań normalarynyń oryndalýyn baqylaityn bolamyz», - dep jaýap berdi Premer-Ministr.
