Premer-ministr Álihan Smaiylov kásipkerlik qyzmette "taza paraqtan bastap" retteýdi engizý jáne memlekettik baqylaý men qadaǵalaýdy avtomattandyrý jóninde keńes ótkizdi, - dep habarlaidy "Ult aqparat" primeminister.kz saityna silteme jasap.
Ulttyq ekonomika ministri Álibek Qýantyrov kólik, saýda, qoǵamdyq tamaqtaný, qonaqúi qyzmetteri, jyljymaityn múlikpen operatsiialar, taý-ken óndirý ónerkásibi, kompiýterlik baǵdarlamalaý, tutynýshylardyń quqyqtaryn qorǵaý, aqparat jáne bailanys salalaryndaǵy retteýshi aktilerge júrgizilgen taldaý aiaqtalǵanyn atap ótti.
Onyń qorytyndysy boiynsha anyqtalǵan 22 myńnan asa talaptyń shamamen 3,8 myńy (17 paiyz) jańa retteýshilik saiasattyń bazalyq sharttaryna sáikes kelmeidi, sondyqtan olardyń kúshi joiylady nemese qaita qaralady.
Osy jumystyń birinshi kezeńi aiasynda taǵy jeti sala boiynsha taldaý jalǵasyp jatyr. Bul aýyl sharýashylyǵy, qoimalaý, qubyr kóligi, qurylys, avtomobilder men mototsiklderdi jóndeý, kóshi-qon, avtorlyq quqyq jáne aralas quqyqtarǵa qatysty.
Premer-ministr tiisti úilestirýdiń bolmaýynan keibir memlekettik organdar belgilengen merzimderdi saqtamaitynyn jáne bul bekitilgen jospar-kesteni oryndaýdy keshiktiretinin atap ótti.
"Bul reformanyń mańyzdy ekenin taǵy da qaitalaimyn. Únemi keiinge qaldyra berýge bolmaidy, bul týraly qansha aitýǵa bolady? Barlyq negizsiz talaptardy tezirek alyp tastaýymyz kerek. Retteýshi aktiler boiynsha barlyq jumysty biyl aiaqtaý qajet", - dedi Álihan Smaiylov.
Premer-ministr bizneske qoiylatyn jańa talaptardy engizýde óte muqiiat bolý kerektigin aitty.
"Jańadan qabyldanatyn retteýshilik talaptarǵa baqylaýdy kúsheitýimiz kerek. Eger "Atameken" UKP tarapynan qandai da bir másele boiynsha kelispeýshilik bolsa, onda bul máseleni sheshý kerek, buǵan kóz juma qaraýǵa bolmaidy", - dedi Álihan Smaiylov.
Sonymen qatar otyrysta memlekettik baqylaý júiesin tolyq avtomattandyrýǵa kóshý aiasynda memlekettik organdardyń aqparattyq júielerin taldaý aiaqtalyp, salalyq táýekelder matritsalary qalyptastyrylǵany atap ótildi.
Búgingi tańda Smart Data Ukimet aqparattyq-taldaý júiesi jańartylyp jatyr, ony 2023 jyldyń ortasynda paidalanýǵa berý josparlanyp otyr.
Sondai-aq, premer-ministr bul jumysty jandandyrýdy jáne memlekettik organdarmen kelisý merzimderin qysqartýdy qaita qaraýdy tapsyrdy.
