Aqtóbe oblysynan usynylǵan úmitkerlerdiń ishinde jastar jáne meditsina qyzmetkeri bar. Olar «Nur Otan» partiiasy Aqtóbe oblystyq filialynyń kezekten tys XXX konferentsiiasynda pikirsaiys pen daýys berý qorytyndysy arqyly anyqtaldy, dep habarlaidy "Ult aqparat".
Óńirde úmitkerler arasynda pikirsaiys ótti. Olar óz sailaýaldy baǵdarlamasyn tanystyryp, jobalaryn usyndy. Keibiri ózekti máselelerdi qozǵap, sheshý jolyn kórsetti.
Pikirsaiys qorytyndysy boiynsha 15 úmitkerge «Praimeriz» aqparattyq júiesi arqyly 109 delegat daýys berdi. Nátijesinde eń kóp upai jinaǵan tórteýi oblystyń ókildik kvotasyna sáikes Májilistegi partiialyq tizimge úmitker retinde tirkeldi.
Nátijesinde Grek-rim, erkin jáne áielder kúresi oblystyq federatsiiasynyń prezidenti Rahat Sydyqov eń kóp daýys jinady. Ekinshi oryndy 96 daýyspen memlekettik qyzmetker Amanǵali Berdalin ielendi.
Sonymen birge tizimge «DARU Medical Group» bas direktory Ǵalymjan Eleýov, «Jas Otan» jastar qanaty Aqtóbe oblystyq filialynyń tóraǵasy Asyljan Búrkitalin kirdi.
«Praimeriz – bizdiń ortaq jeńisimiz. Maqsat bir. Ol maqsat – el men halyqqa qyzmet etý, memleketimizdi kórkeitý. Pikirsaiys barysynda túrli másele kóterildi, onyń sheshý joldary da aityldy. Munda «júzden júirik, myńnan tulpar» degendei eń úzdigi anyqtaldy», - dedi partiianyń oblystyq filialynyń tóraǵasy, oblys ákimi Ońdasyn Orazalin. Konferentsiiada oblystyq máslihatqa 50 adamnan turatyn partiialyq tizim bekitildi. Onyń ishinde áielderdiń úlesi 9 paiyzdan 30 paiyzǵa al 35 jasqa deiingi jastar qatary 20 paiyzǵa artty. Tizimdegilerdiń 41 paiyzyn shaǵyn jáne orta biznes ókilderi qurady. Al bilim berý salasy 13 paiyz, kvazimemlekettik sektor – 8 paiyz.
Aita ketý kerek, oblys boiynsha praimerizdiń birinshi kezeńine 460 úmitker qatysty. Onyń 36,7 paiyzyn áielder, 28 paiyzyn 35 jasqa deiingi jastar qurady.
Daýys berýge 28,6 myńnan astam partiia múshesi qatysty.
