«Qazaqstan Temir joly» AQ baspasóz qyzmeti arzan biletke qol jetkizý joldaryn aityp berdi.
Baspasóz qyzmeti habarlaǵandai, «Jolaýshylar tasymaly» AQ 2018 jyldyń 11 qyrkúieginen bastap Qazaqstan ishindegi áleýmettik mańyzy bar baǵyttarǵa baǵany retteý júiesin ózgertken bolatyn.
Atap aitqanda, bul jeńildikter tirkeme men ózge elderdiń baǵdarlaryn, jekemenshik kompaniialardyń poiyzdaryn qospaǵanda 52 baǵyt boiynsha beriledi.
«Baǵalardy retteýdiń jańa júiesi dinamikalyq tariftik basqarý baǵdarlamasy boiynsha quraldy. Bul álemdik áýe jáne temir jol tasymalynda paidalanylatyn tájiribe. Jolaýshylar Qazaqstan ishindegi baǵytqa temir jol biletterin 45 kún buryn satyp alsa, 25%-dyq jeńildik bar. Jeńildik kólemi bos oryn sanyna, attaný kúnine deiin qansha táýlik qalǵanyna bailanysty bolmaq. Júretin kún jaqyndaǵanda biletke 25%-dan artyq ústeme qosylmaidy. Qazaqstan boiynsha budan bólek 14 kommertsiialyq baǵyt bar. Olardyń 9-y «Talgoǵa» tiesili. QR zańnamasyna sáikes, kommertsiialyq baǵytta bilet qunyn tasymaldaýshy ózi qoiady. Baǵa jolaýshylar aǵyny mereke kúnderi basymdyq beriletin baǵyttarǵa bailanysty bolady. Bul baǵyttarda bilet quny +- 35 paiyzǵa deiin jetedi. Jolaýshylar 35 %-dyq jeńildikpen, nemese 35 %-dyq ústememen satyp ala alady. Bilet qunynan túsken qarjy negizinen jańa servistik qyzmetterdi engizýge, vagon parkiniń tehnikalyq qamtylýyn jaqsartýǵa jumsalady», - deidi «Qazaqstan temir joly» AQ baspasóz hatshysy Rýslan Imanqulov.
Aita ketý kerek, áleýmettik jelide temir jol biletteriniń asa qymbattyǵyn, poiyzdardaǵy servistik joqtyǵyn synaýshylardyń sany kóp.
