Álemdi jasyl ekonomikaǵa tiimdiligi jaǵynan ózine qaratqan Astana qalasynda ótip jatqan halyqaralyq «EXPO-2017» kórmesiniń ashylýyna orai, Boraldai kentinde taǵy bir nysan paidalanýǵa berildi. Zamanaýi úlgide jumys isteitin «jasyl» mobildi poshta bólimshesi iske qosyldy.
Tutynýshylarǵa qyzmet kórsetý joldary jetildirilgen «Qazposhta» AQ-nyń jańartylǵan Ortalyq operatsiia ýchaskesiniń ashylý rásimine «Qazposhta» AQ-nyń basshysy Sáken Sársenov, aýdan ákimi Qydyrgeldi Medeýov, aýdandyq «Qazposhta» torabynyń basshysy Raigúl Meiirova qatysyp, ujym qyzmetkerlerin poshta bólimshesiniń ashylýymen quttyqtady.
Aita keteiik, derbes qýat kózimen jabdyqtalǵan poshta bailanysynyń mobildi bólimshesi el boiynsha jalǵyz nusqa. Bul pilottyq joba bolǵandyqtan, ári qarai atqarylatyn jumystyń mańyzdylyǵy, tiimdiligi jiti tekseriledi. Eger tiimdi bolsa, elimizdiń barlyq óńirine salynady. Bul týraly «Qazposhta» AQ-nyń basshysy Sáken Sársenov keńinen aityp berdi.
– Qazposhta qashanda óz jumysyna eń sońǵy tehnologiialardy paidalanýǵa talpynady. Bul bizdiń jumysymyzdy ońtailandyryp qana qoimaidy, qorshaǵan ortany da qorǵaidy. Biz energiiany únemdeýshi tehnologiialarmen jumys isteitin alǵashqy mobildi bólimshemizdi ashyp otyrmyz. Muny pilottyq rejimde iske qostyq, bir jyl ishinde paidalaný nátijesine qarap, bul tájiribeni basqa óńirlerge de taratý týraly sheshim qabyldaityn bolamyz, – dedi ol.
Zamannyń suranysyna sai órkenietti elderdiń úlgisine ótip, 200-ge jýyq qyzmet túrin kórsetýge kóshýdiń ózi úlken jetistik. Mundai jańashyl baǵyttaǵy jumysty aýdanymyzdaǵy «Qazposhta» filialynda eńbek etetin 149-ǵa jýyq maman júrgizýde.
Jańa bólimshe operatorlardyń jumys oryndarymen, sharýashylyq bóligimen, halyqty qabyldaý jáne qyzmet kórsetý oryn jailarymen jabdyqtalǵan. Bólimshe derbes bolyp tabylatyndyqtan, elektr jelilerine qosylýdy qajet etpeidi. Bul modýldi ǵimarat úsh konteinerden biriktirilgen, eshbir artyq shyǵynsyz uzaq ýaqyt paidalanýǵa bolady. Arnaiy jylý júiesimen jabdyqtalǵan, ol jazda jeldetkish júiesi retinde jumys isteidi, sý jylytqyshy ornatylǵan, ol jyl boiy qyzmetkerlerdi ystyq sýmen qamtamasyz etedi. Atalǵan format kompaniianyń óndiristik shyǵyndaryn qysqartýǵa aitarlyqtai úlesin qosady, turǵyndarǵa da jaily.
– Boraldaida 80 myńǵa jýyq turǵyn turady. Kún saiyn 200-ge jýyq adam kelip hat-habar zeinetaqy jáne basqa da qyzmet túrin paidalanady. Al myna mobildi poshta biz úshin óte qajet edi. «Qazposhta» aktsionerlik qoǵamyna aýyl turǵyndary atynan alǵys aitamyn, –dedi Boraldai aýyldyq okrýgi ákimi Murat Sálimbaev.
Poshtalyq jáne qarjylyq qyzmetter boiynsha jeke tulǵalar úshin operatsiialyq zal aptasyna 6 kún qyzmet etedi. Sondai-aq, boraldailyqtarǵa gazet-jýrnal, hat habarlardyń der kezinde jetýine jáne qyzmet kórsetý sapasyn jaqsartý maqsatynda jańa avtotransportpen qatar bir skýter, úsh velosiped paidalanýǵa berildi.
Maqpal MYSA
